雅虎香港新聞 李玟離世︳曾辦億元婚禮 李玟與加籍富商樂裕民分居2年正辦離婚手續
天后李玟(Coco)輕生離世，終年48歲。李玟家姐李思林透露，CoCo數年前患上抑鬱症，但近日病情急轉直下。近年一直有傳Coco同加籍富商老公樂裕民(Bruce Rockowitz)出現感情問題，Coco離世後更有報導指Coco同Bruce已經分居2年幾，並正處理離婚手續。
2003年，Coco喺品牌活動上認識企業高層Bruce，旋即打得火熱，二人相戀8年後於2011年結婚。已貴為國際天后嘅Coco因為認為喺成長地香港嘅日落下成婚最浪漫，於是選擇喺Sky 100行禮。當年Coco同Bruce嘅婚禮一連2日舉行，仲請到國際級歌手Bruno Mars等人演出﹐據報呢個婚禮耗資過億。
婚後Coco同Bruce住喺Bruce名下嘅南區過億豪宅。呢兩三年因為疫情，不時見到Coco分享家居照。但近年亦傳出Coco同Bruce婚變，指Bruce不止一次出軌，甚至連Bruce同前妻所生嘅女兒都企喺爸爸一邊，令Coco失望之餘亦停止喺社交平台追蹤2個繼女。
Coco離世後，有傳Coco早已同Bruce分居2年幾。由Coco喺媽媽同家姐嘅山頂屋企出事，由此可見Coco已經冇住喺南區同Bruce一齊生活嘅屋企。消息話Coco同Bruce正辦理離婚手續，已經大致處理好。
Coco二家姐李思林Nancy去年參加《中年好聲音》後不時為TVB演出。Nancy年初為台慶頒獎禮綵排時見記者，表示唔方便回應Coco婚姻情況，但就話「佢盡咗做妻子同繼母嘅責任」，而對於Bruce佢就話「作為親人當然唔喜歡佢」，似乎早已暗示Coco婚變。
李玟離世相關內容：
｜李玟離世︳曾辦億元婚禮 李玟與加籍富商樂裕民分居2年正辦離婚手續
｜李玟離世︳唱國語歌走紅 李玟其實係香港人 住南區過億豪宅 同香港好有淵源
｜李玟離世︱輕生前留給粉絲 40 秒錄音 「非常想念大家，我在努力」
按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！
