李龍基香港演唱會門票停售 主辦單位以「不可抗力因素」宣布延期

呢期新聞多多嘅李龍基，本月下旬將於旺角麥花臣場館舉行《真情流淚基不可失》演唱會。個唱上周起公開賣飛，但係喺售票平台，基哥個唱已經無法網上購票，並列出「門票配售完畢」。而網媒Timable就指，佢地尋日check過基哥個唱售票情況，可以登入揀位而且仲有第5行嘅座位未賣出。

小編上過售票平台網站了解，Ian陳卓賢、AK江𤒹生及日本歌后宇多田光呢類門票售罄嘅個唱，購票頁面同樣標明「門票配售完畢」，但平台首頁會喺歌手照片上加上「售罄」字樣提醒，而李龍基個唱宣傳照就未見加上「售罄」字樣。

個唱主辦單位之一神話娛樂尋日喺IG發出通告，指出李龍基個唱「因不可抗力因素宣布延期」，並公布退票安排。

73歲嘅李龍基早前仍然為香港個唱接受訪問宣傳，當然有提到未婚妻王青霞(Chris)。基哥透露Chris而家被囚於羅湖監獄，嗰度好多蚊，諗起就心痛，講到呢度就語帶哽咽。基哥話Chris要坐到明年7月7日，記者追問基哥點解決「個人需要」，基哥話自己唔係廿幾歲咁渴求，佢熱愛模型飛機，玩飛機都得。

基哥未婚妻Chris因承認違反逗留條件、管有虛假文書等罪名，被判入獄25個月。基哥上周舉行嘅澳門個唱海報，出現標語「風繼續吹 女繼續追」令網民議論紛紛。其後李龍基回應指自己同澳門個唱主辦單位並非直接對口，當佢見到個唱海報標語「風繼續吹 女繼續追」後已立即聯絡中介人，但對方話時間太短急需出街，結果生米煮成熟飯。基哥強調呢句標語係未問過佢就出街，而且已經冇得改。不過基哥樂觀地諗「女繼續追」嘅女係指「老婆」Chris，而家要用心追佢返嚟。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！