東張西望│聾啞人士美華獲同區體恤安置：我要攞返我屋企！

無綫節目《東張西望》上月報道關於聾啞人士美華單位被保安阿娟佔據，被趕出家門喺走廊露宿，事件隨即獲得觀眾關注。《東張西望》團隊與志願人士亦有繼續跟進事件，去到噚晚最新一集（19日）節目再次跟進美華近況。

噚晚《東張西望》就指美華已經向房署申請同區體恤安置，並得到快速獲批，被編配到同區一個公屋單位。《東張西望》團隊及義工陪美華返李鄭屋邨居所收拾物品，及打點新居。重返家園收拾物品後，美華透過手語傳譯表示：「而家呢度已經唔同咗，我鍾意爸爸媽媽嘅屋企，因為係爸爸媽媽買嘅，而家俾阿娟裝修都完全唔同晒，所以我唔鍾意啦！」及表示：「呢度係我屋企，我會攞返我屋企，應該叫阿娟走先啱。我要攞返我屋企！」

美華獲編配嘅新居係一人單位，節目組為佢添置家具作為入伙禮物。美華只係拎咗少量所須品去到新居，佢就表示：「呢度暫時住住先，好想快啲搬返去舊屋企，所以呢度放少少嘢就得啦，掛住以前嗰個屋企多啲，因為嗰個係屬於爸爸媽媽送俾我嘅屋企。」

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！