林峯澳門演唱會｜佘詩曼做嘉賓合體唱《愛在記憶中找你》 網民大讚：聽得出好俾心機練

林峯五場《LOVE FLOWS 林峯澳門演唱會》已於前晚（7日）倫敦人綜藝館展開，一連兩個週末舉行，唱盡《愛不疚》、《記得忘記》、《CHOK》、《幼稚完》等多首經典歌，仲驚喜唱埋《數碼暴龍3》主題曲《馴獸師之王》，入場觀眾都大讚係個回憶殺演唱會。林峯於邀請嘉賓方面亦落足心思，頭場（7日）請來好兄弟吳卓羲合唱《別怪她》，昨晚（8日）第二場又邀請到合作過多部劇集嘅佘詩曼作嘉賓，再次喚起無數網民嘅回憶。

林峯於第二場場次演唱《愛在記憶中找你》期間，佘詩曼驚喜上台與林峯合體，林峯仲彬彬有禮咁拖住佘詩曼，相當浪漫；之後，佘詩曼就留喺台到獻唱《唯獨你是不可取替》，佢於唱歌前仲分享自己嘅心情：「我係好驚嘅，但經過兄弟、姊妹鼓勵下，唉，嚟啦！」唱完之後，觀眾仲不斷大叫Encore。佘詩曼亦於事後喺IG限時動態分享花絮，寫道：「真係好耐無試過咁緊張」，片中嘅佢相當緊張，仲表示：「我都係返番演戲算啦」。不過，網民對於佘詩曼嘅表現相當滿意，除咗大讚佘詩曼係義氣仔女，更認為佢唱歌好聽：「爆seed釘姐」、「簡直可一不可再！如果可再合唱愛在三千的宇宙就好」、「看得出來很緊張很怕，但你做到了」、「哈哈哈，好可愛」、「絕絕子，回憶殺！！女神現場太穩了！」、「聽得出好俾心機練」、「已經好好，她勁緊張」、「只是拍子有啲free style，band did a good job following her（樂隊跟得佢好好），把聲幾特別聲線都好好」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！