林芊妤離開TVB成低谷險輕生 瑜伽助重生輕鬆面對負評：最介意嘅係自己

林芊妤（Coffee）自離開TVB轉型至瑜伽導師及YouTuber後人氣有增無減，YouTuber頻道累積過百萬訂閱，亦推出自家瑜伽服品牌。日前林芊妤作客陳敏之YouTube頻道做嘉賓時，重提「Gathering」舊事，指瑜伽幫佢走過人生低谷；而林芊妤亦喺個人網站中提到當年解約後為生活而跳出舒適圈。

林芊妤分享指，雖然唔同意TVB教藝人無論遇到咩事都唔好發聲嘅一套，但當時遭解約仍然唔想走，直言因為唔知自己以後條路可以點行，仲因為咁諗過輕生：「會唔會食多幾粒安眠就咁瞓咗就算？」幸好，當時只係瞓咗30幾個鐘。受TVB以及原生福建家庭影響下，過往嘅林芊妤遇到問題好多時都會選擇啞忍，就如佢喺影片中分享試過有次同老公搭的士，司機因為唔認得戴上口罩嘅林芊妤，而喺閒聊間講出：「咪好似嗰個Coffee咁，嗰時一件咁嘅事，就可以紅到咁，我都唔知見過佢瞓過幾多男人」。

林芊妤續稱自己嗰陣無回應司機，至於唔太識廣東話嘅老公落車後得知事件，即時大感生氣，認為唔係事實嘅話應該要反駁，仲講到林芊妤呢種性格點樣保護個仔：「佢話點解你唔保護自己呢？點解唔為自己企出嚟，但我好習慣係咁，以前發生嗰件事都係唔出聲由佢過就算。咁佢個重點就話，咁你點保護你個仔？當你個仔喺度讀書嘅時候佢都會面對呢啲人，你係咪要佢同你同一樣嘅方法去對人？」林芊妤因而受到啟發，認為面對評擊唔能夠再軟弱，要教育好下一代先要保護好自己。

及後，林芊妤開始改變自己，覺得如果有啲人對佢有誤會，佢會出聲嘗試平反；尤其係離開TVB後，每次發佈嘅嘢都會被加上某一個標籤，林芊妤回想當時喺低谷狀態，但覺得人要先接受自己：「唔好咁認真，因為就算人哋笑你，都係茶餘飯後話題，最介意嘅人就係你自己。」直至而家，林芊妤覺得呢啲只係無營養嘅說話，更加笑指：「面對負評，我係第二，應該都無人敢認第一。」對於唔係一帆風順嘅人生，林芊妤喺個人網站指會用行動改變自己，亦分享：「人生不會只有直路，前面沒路就轉個彎吧。」

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！