林芊妤Coffee著瑜珈褲拜山惹爭議 發長文及實行30日「leggings challenge」反擊網民

林芊妤Coffee著瑜珈褲拜山惹爭議 發長文及實行30日「leggings challenge」反擊網民

林芊妤(Coffee)由藝人轉行做瑜珈導師相當成功,又推出自家瑜珈服品牌CoffeeSweat,不時都會穿上自家瑜珈服作生招牌。日前,林芊妤於重陽節與家人前往掃墓,其瑜珈褲打扮就被網民批評,驚訝Coffee拜山都要著瑜珈褲,令Coffee親自回應:「我想問有咩問題?」;Coffee仲喺IG發長文反擊網民,又決定實行一個為期30日嘅「leggings challenge」。

瑜珈褲係近年極具爭議嘅外出穿搭造型之一,部分人認為瑜珈褲太貼身,又唔明點解女性唔係做運動都要著出街。有網民就批評Coffee著瑜珈褲去拜山,又扯到去Coffee個性問題:「佢個個性就係咁,喜歡人睇,驚死人唔認得佢呀嘛」;Coffee就忍唔住回應及截圖分享,表示睇到呢個留言真係眼都突埋,解釋指當日由山腳柴灣行到山頂凌霄閣,全程行到身水身汗,反問網民著運動衫係有乜嘢問題:「總好過我著到登台咁去拜山啦係咪?同埋我之後都係去郊外風箏場野餐同放風箏,全日都係運動日」,又指現場都有好多女仔著瑜珈褲,登高都係運動嘅一種:「我唔著瑜珈褲,唔通我著條裙去會合理啲?」

Coffee亦發長文表示,唔明白點解著自己鍾意嘅衣著出街都要畀人討論及標籤:「如果你覺得我哋着(著)得唔靚又貼身又肥又露,難道我哋又一定覺得你嘅衣着好好睇?我想講喺呢個世界上需要討好既人就只有自己,自己鍾意着(著)咩出街唔到其他人理(只要合法)。」又提到如果呢個世界少啲批評多啲接受,會更加美好。就此,Coffee決定實行為期30日嘅「leggings challenge」:「無論食飯行街去Event去買餸,任何諗得出嘅場合都着(著)leggings(情況許可嘅話)」,除咗要話畀所有人聽佢鍾意著咩衫係自己話事之餘,更加係為所有鐘意著瑜珈褲出街嘅女仔出返啖氣。唔少網民都留言力撐Coffee,表示著瑜珈褲出街好平常,重點係要自己舒服;但有網民留言揶揄:「支持30 days殘廁gathering challenge」,Coffee忍唔住回應:「呢個challenge你自己玩啦」。

林芊妤(Coffee)
林芊妤(Coffee)
林芊妤(Coffee)
林芊妤(Coffee)
林芊妤(Coffee)
林芊妤(Coffee)
林芊妤(Coffee)
林芊妤(Coffee)

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可換領限量新人禮,立即下載!