楊思琦廣州街頭拍美食介紹 網民斥無防疫意識兼反應極浮誇

楊思琦近年主力於內地發展，積極經營抖音、微博等內地社交平台；日前，楊思琦就分享咗一條喺廣州上下九步行街介紹打卡地道小食嘅影片，不過就被網民直斥佢唔戴口罩、缺乏防疫意識，又指其反應過份浮誇。

影片中，楊思琦分別用上極誇張嘅語氣同形容詞介紹兩款小食：豉油王蒸腸粉及順德爽魚皮，首先佢激讚腸粉晶瑩剔透：「腸粉皮仲薄過我塊臉」；又指魚皮好似海蜇咁爽口，最後仲摸住自己個肚直言非常滿足。網民睇到楊思琦嘅介紹後，反而將焦點放喺楊思琦喺內地疫情嚴峻期間唔戴口罩走在街頭，紛紛留言︰「疫情期間點解唔戴個口罩呀？你驚人哋認唔到你呀？」、「在廣州疫情這麼嚴重，都不戴口罩」、「請公眾人物帶好頭，出街請戴口罩」等等；都有網民覺得楊思琦影片中嘅反應過份浮誇，認為佢介紹嘅食物都唔係真係話好特別。

另外，楊思琦化上全妝，以粉紅上衣造型進行拍攝，雖然走在街頭都無人認得，但就有唔少網民大讚43歲嘅楊思琦樣貌仍然甜美：「容顏還是這麼甜美」、「一直都太喜歡你笑了，好甜呀」、「瘦了好多，TVB肉肉的時候好漂亮，現在也漂亮，就是感覺好瘦！」、「還是那麼可愛那麼美呀」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！