楊愛瑾Miki小紅書拍片分享近況 普通話旁白極唔自然 網民：不如講返廣東話

前女子組合Cookies成員楊愛瑾（Miki），2016年與永安集團太子爺郭永淳結婚後淡出娛樂圈，專心相夫教子並過著闊太生活，雖然39歲嘅Miki已經係兩孩之母，但依然童顏。Miki經常於社交平台分享家庭樂及周遊列國嘅照片，睇起嚟相當幸福；近日，Miki開咗個小紅書帳號與內地網民分享生活，其普通話就被網民嫌棄。

Miki於本月初開設小紅書帳號與內地網民互動，至今共有6個帖文，起初Miki只係發布到唔同國家及城市旅遊嘅照片，但近日佢上載咗「香港探店」嘅短片，與大家分享佢與老公到銅鑼灣一間餐廳享用海膽盛宴嘅情況，更將海膽盛宴形容為天花板級別。雖然見到Miki食嘢食到好滿足，但佢成段影片只係得現場錄影期間講嘅一句「師傅話可能係世上最甜嘅蝦」係廣東話，其餘旁白都係用普通話，而Miki嘅普通話亦唔係特別流利，感覺係斷斷續續咁講出嚟，極唔自然，有網民就留言叫Miki不如講返廣東話：「中意miki〜可以粤語架〜下次可以ootd埋，哈哈」、「講白話好過」、「下次不如講返廣東話啦，啲普通話一個字一個字咁彈出嚟，好鬼奇怪」等等，另外更有網民指佢撞樣前隊友Stephy鄧麗欣。

前幾日，Miki又再PO出「和老友的香港一日」嘅Vlog，分享與朋友食日本嘢聚會及奢侈品牌秋冬預覽會嘅一日行程，影片亦係用普通話旁白，再有網民留言：「可以講白話嘅其實」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！