楊潮凱入行13年由侍衛到執導電影 坦言過程充滿無力感含淚感激父母支持

楊潮凱除咗演戲，去年更首度執導電影《喜歡妳是妳》，先後入圍大阪亞洲電影節及榮獲第29屆澳洲影展觀眾票選最佳劇情片獎；近日楊潮凱擔任TVB節目《人夫放假約出去滾》嘉賓，與主持林盛斌（Bob）大談入行13年辛酸，提到父母喺追夢路上給予無限支持，楊潮凱更當場落淚。

楊潮凱與Bob回顧自己細個成績極差，小五中意「蒲」足球場，而中學時期就鍾情於結他、夾Band。直至經歷過會考成績唔理想，加上哥哥和姐姐都升到大學，楊潮凱覺得自己都唔可以衰：「我要證明畀人睇，我可以讀大學。」於是中六開始每日放學都會去自修室溫習到晚上10點，結果憑住努力，高級會考成績理想並考入香港城市大學修讀創意媒體，發掘到自己演戲天賦。於是從無諗過入娛樂圈嘅楊潮凱就報名參加第23期藝員訓練班，繼而參演唔同劇集嘅無名氏；楊潮凱分享，出演《宮心計》侍衛令佢畢生難忘，當時導演叫佢埋去睇重播，直斥楊潮凱武打動作好肉酸：「嗰次嘅經驗令我好明白，你唔ready你自己，就算個機會畀咗你都無用。」

入行13年，被問到幾時覺得自己正在上位，楊潮凱就直言自己從無上過位，但就記得當年以新人姿態飾演《天與地》陳豪年輕版，觀眾同記者反應都好熱烈，覺得好感動咁話。對於演藝事業，楊潮凱表示幸得父母一直支持，邊說邊感觸含淚：「從事呢行，好多時候都覺得無力，唔知可以點再進一步。」不過楊潮凱父母多年來總會有意無意叫佢加油，亦從無要求楊潮凱要畀到啲咩佢哋，令佢堅持至今，覺得父母見到佢做到自己想做嘅嘢，都會好開心同感動。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！