槍林彈雨中搵周公

星島日報

【星島日報報道】挾住創造中國歷史紀錄、橫掃票房的《戰狼II》,上周四香港上映,接近三十家戲院,家家去盡,一日做五、六場,不過呢,唔唔唔,票房認真麻麻。點解呢?其實大家知 ,不過,無謂踢爆啦。此片在美國票房亦是冇乜反應,與中國內地的狂熱,差天共地,無他,欠缺共鳴也。

作為傳媒人,如此有代表性的電影,當然第一時間入場,睇戲之外,亦睇人!睇睇邊類觀眾會捧場。咦,發覺似乎上年紀者,比例遠比年輕人多 。此乃社會學及政治學論文題。

講講套戲,畀幾十蚊入場,真真抵睇到無話可說。不單止飛機大炮導彈坦克,連戰艦亦出多艘,擺到明有國家力量在背後支持。 ,如此鼓吹愛國又百分百政治正確,換轉哪個地方政府,都會鼎力支持,因效果遠勝在課室講幾百小時國民教育也。其實,拍呢類愛國英雄纖滅敵人片,美國荷里活早達祖師級,N年前的《Rambo》,最為經典。之後,套套猛片將俄國人、越南人、中國人、中東人、外星人……盡情妖魔化,然後就由「我國」派出最精銳部隊去執行「正義任務」,打個落花流水。最後,當然「我國」英雄贏晒,「邪惡敵人」瓜清,勝利完成任務。

呢類BB仔劇本,真真編劇班初哥都隨時寫到十個八個。所以,電影賣唔賣得,就要睇睇「英雄」邊個扮演、「敵人」夠唔夠妖魔。然後,製作有幾大,槍戰炮戰有幾勁,打得是否燦爛。

平情而論,《戰狼II》經已達到荷里活B級頂水平,吳京簡直搵命博,作為新進導演,的確出色。不過,大約一小時後,在打到開花畫面下,我竟然去 搵周公!點解?因此片毫無快慢緩急高潮低潮,只似一個食 興奮劑的人,腎上腺素爆表。人,不停興奮,就會變唔興奮,似「入芝蘭之室,久而不聞其香,即與之化矣」。

阿碌開咪 曾智華

副刊

其他內容