《殘酷一叮》即將回歸？經典參加者逐個數

近年無綫自家制嘅節目收視同囗碑都不及往年，為左挽救劣勢，炒冷飯可能係其中一個方法，所以有傳李克勤被無綫邀請主持《殘酷一叮》邁向50周年版，而克勤就開到聲想同昔日拍擋梁榮忠及參加者莫凱謙一齊主持，不過梁榮忠就話未必配合到，因為佢會減少幕前演出，專注導演工作。

2005年無綫第一次舉辦《殘酷一叮》，當時叫好又叫座，成為唔少人茶餘飯後嘅討論話題，咁今日我哋就同大家重溫下《殘酷一叮》嘅經典參加者啦！

關浩揚
關浩揚係邊個？咪就係當年臀跳拉丁舞嗰個「拉丁霍啟剛」呀！憑著邊唱邊扭《Lady Marmalade》獲得75秒成為第一輯第一位台主。比賽完之後，佢就成為無綫旗下藝員，當中最多人記得應該係喺《女人俱樂部》飾演後生版江欣燕個衰阿哥。

莫凱謙
1998年出生嘅莫凱謙，當年人仔細細就走去參加比賽，當時與主持人嘅老積對話搶盡風頭。加上佢唱起情歌上嚟感情豐富唔怯場、一啲都唔會輸蝕比大人，唱《月亮代表我的心》成功獲得75秒成為台主。唔經唔覺佢已經18歲，而家就讀香港中文大學新傳系，為咗達成音樂夢，佢就一邊讀書一邊玩音樂，期間仲參加唔少歌唱比賽，早前已被唱片公司賞識，睇嚟畢業之後就會簽約做歌手。

喬寶寶
如果要講邊個係最出名嘅參加者，一定非喬寶寶莫屬。當年憑住邊搞笑邊唱廣東歌成功出位，佢仲試過將自己胸毛剃成TVB三個英文字母，令人留下深刻印象。之後，佢加入無綫成為藝員，拍過唔少劇集。

趙展彤
又係一個小朋友參加者，當時佢穿著紅色旗袍唱出《夜上海》獲得60秒成為台主。之後佢仲參加左《超級巨聲》及《中國好聲音》，其後有唔少內地登台及演出機會。

馮文樂
第二輯首位台主，佢一把好歌喉集譚詠麟丶張學友丶李克勤丶許志安等於一身。佢模仿譚詠麟唱《一生中最愛》獲得99秒佳積，之後再演唱《愛的根源》以117秒破第二季紀錄成為台主。最後憑《愛是永恆》成為叮皇。