鄧麗欣東方昇幫手清理垃圾屋驚見死老鼠 場面震撼「有山嘅感覺」

慈善團體「點滴是生命」除咗協助發展中國家推行有關「淨水與衛生」項目之外，仲有進行社區項目。「點滴在社區」早前接到一個特別求助，一位婆婆屋企幾乎被雜物填滿，更因為囤積問題而面臨被逼遷危機，急需人手幫忙整理家居。於是，點滴團隊搵嚟星級助手Stephy鄧麗欣同東方昇幫忙「打大佬」。

執屋前Stephy已經睇定婆婆間屋嘅相，因此事前準備就係做好心理準備，Stephy仲話喺自己屋企執嘢當練習。不過去到現場，Stephy同東方昇都係俾婆婆屋企雜物堆積嘅情況震撼到，Stephy直情「嘩」足4次，而東方昇就形容「有山嘅感覺」。

從片段所見，鄧麗欣同東方昇真係落手落腳執屋，而屋入面多雜物之外，衛生環境仲好惡劣。東方昇打開婆婆嘅雪櫃，裡面嘅食物全部發霉變黑，外賣碗入面裝住變成綠色嘅液體。更恐怖係有清潔工人喺垃圾堆中搵到死老鼠，疑似係被垃圾責死！可想而知，婆婆間屋真係好多雜物。

執咗半日，Stephy同一班義工都只係清咗部份雜物，於是團隊安排佢執行事先準備嘅任務，同婆婆傾偈及影Selfie。原來婆婆嘅雜物係6年來堆積而成，好多都係買返嚟冇用。而根據「點滴」嘅介紹，婆婆本來同媽媽及哥哥同住，後來家人相繼離世同入住老人院，獨居嘅婆婆開始購物囤積。

東方昇都有發文描述今次執屋經過，「四圍係飄揚住一浸死老鼠同埋老鼠屎嘅味道…（而婆婆好聰明咁喺垃圾山當中掉咗超過過百包樟腦丸，嘗試冚咗嗰浸難聞嘅氣味」、「而過程中唔係掉垃圾咁簡單，因為婆婆收收埋埋好多錢喺啲垃圾當中，我哋每個垃圾都要仔細睇一睇，睇吓啲袋仔裏面有冇收埋啲銀仔。最終掉出嚟嘅垃圾唔係以袋計，係以噸計！最後係成個貨車櫃都爆曬」。東方昇認為今次執屋自己都有得著。「最重要係我哋有真係有了解佢囤積背後嘅心理，其實我覺得佢係缺乏親人，甚至街坊街里嘅關心，然後嘗試透過購物同埋囤積填補心靈嘅空虛」。成件事未完，Stephy形容情況惡劣嘅廁所，東方昇似乎要挑戰進行清理……

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！