53歲江美儀自爆有玩交友Apps 目的係搵35至40歲嘅精壯男「炮友」?

現年53歲江美儀自2018年與吳君祥離婚後，一直保持單身狀態。喺前晚（5日），佢同吳家樂主持網台節目《娛樂好好玩》，繼續大談圈中熱話及大爆秘聞，期間江美儀自爆有玩交友Apps，而目的真係搵35至40歲嘅精壯男「炮友」。

前晚嘅《娛樂好好玩》前半內容主要圍繞Babyface港男墮相親騙局後對《東張》女神梁敏巧（Maggie）展開30日嘅求愛計劃，之後佢哋就講到「婚姻介紹所係唔係可以幫到人？」江美儀就分享佢有一位專業人士嘅朋友，早前成功透過交友App覓得另一半，拍拖一年多並準備求婚。見到呢個成功例子後，江美儀就膽粗粗下載交友App試一試。而佢嘅朋友仲分享玩交友App嘅秘訣：「佢仲教我第一次見面千祈唔好食晚飯，有咩事『彈鐘』就早啲走，飲杯咖啡咪好囉。」

江美儀表示自己細心挑選咗幾個有信譽及多成功例子嘅交友App，而佢亦有課金入會，目的係希望可以認識到高質素嘅男士。不過佢亦有講及玩Apps細節：「我登記咗幾個，有啲同我傾過偈、閒聊，我放咗自己張相上去，其中一個交友App以為係假江美儀，仲封咗我，應該有人舉報。」之後，佢仲話唔止佢一個俾人封賬號，方力申及麥明詩都有試過賬號被封。雖然佢膽粗粗玩交友App，不過就暫時未約人出嚟見面，佢都有擔心被人知道佢嘅真正身份，所以現時都係只放側面相片兼使用其他名字。

至於江美儀嘅交友對象，礙於佢係公眾人物，所以佢初初都盡量選擇唔係喺香港，而係搵外國人，甚至內地都有。之後，有好心網民提醒佢好多人經交友App搵「炮友」，點知佢即刻大笑話：「我都係，我冇話過我唔係，我就係想咁咋嘛，你哋以為我做乜，搵真愛呀，哈哈哈！」跟住佢再自爆搵男士嘅年齡要求係35至40歲，吳家樂就問佢係唔係想精壯啲，佢就回答話：「緊係啦大佬，又拍痰呀？」吳家樂再問而家啲後生仔係唔係想驅風，佢就回答話：「我多風，佢幫我驅走一切，佢將我陰霾驅走，迎接我嘅新生命，迎接新嘅前途。」

唔少網民都表示支持及期待江美儀嘅好消息，有網民希望佢可以三年抱兩嘅同時，亦有網民叫佢注意安全，不過佢就回答話：「放心，我而家好難㗎啦，哈哈哈，好難㗎你明㗎啦，好難會出事㗎啦，我想出事呀，綁住個男人嘛，但而家難呀大佬，好忟邊呀而家我。」

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！