法證先鋒6丨吳兆麟自爆臨時拉夫全裸拍攝 郭千瑜Cut機後喊足半小時

劇集《法證先鋒VI：倖存者的救贖》近日單元個案主角為富二代周公子Jeffery（吳兆麟Alan飾）和拜金女楊慧冰（郭千瑜Mina飾），講述阿冰一心飛上枝頭，於夜店成功埋到周公子身，但慘被對方迷姦兼性虐，更成為殺死Jeffery嘅嫌疑犯。兩位演員為咗該場酒店戲份，分別作出唔同程度嘅犧牲。

吳兆麟除咗獸性大發嘅變態樣令觀眾留下深刻印象，近乎全裸於床上「攤屍」亦成焦點之一，吳兆麟透露角色係臨時拉夫，由接到通知、試妝到正式拍攝前後不足一日時間，同時係人生中首次全裸拍攝，拍攝期間一度嚇親同劇演員趙璧渝。吳兆麟表示，雖然拍攝當日足足於床上近四小時，現場又多人出出入入，但其實自己有著肉色打底褲打底，加上有專人即場幫忙整理，所有工作人員又好照顧佢。至於郭千瑜為配合SM情節，每次埋位前都需要花上兩至三小時喺身上及面部化上又深又長嘅血痕，拍攝時又需做出唔同程度嘅痛苦表情。另外，郭千瑜表示醫院嘅爆喊戲份極難忘，因為畀角色嘅處境和對白感動，即使Cut機後仍喊咗半小時。

吳兆麟參加第23期藝員訓練班入行，為J2ers之一，曾主持J2節目《不正常愛情研究所》等多個綜藝節目，亦係《福祿壽訓練學院》參賽者之一，擅長聲音模仿和多種運動。吳兆麟多才多藝，5歲學小提琴及跆拳道，更擁有小提琴8級音樂資格；曾於劇集《婚後事》飾演陳自瑤嘅型仔跳舞老師，與陳自瑤大跳拉丁舞，一出場就引起關注，被網民大讚外型相當加分。吳兆麟當時又透露，其實自己無拉丁舞底子，只係學咗一啲基本跳舞訓練，之後就每日睇YouTube學拉丁舞。

郭千瑜則於2012年透過藝員訓練班入行，擔任藝員之餘，更加係一名老闆娘。郭千瑜20多歲早已踏上創業之路，先後開過美甲店、保健治療養生店、物理治療、健身中心及美容院等等；另外，投資方面亦相當具經驗，20多歲時已擁有首層物業，又與媽媽購入工廈單位作開店投資用途，其夢想係可以喺法國斥資約2000萬購入古式城堡。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！