日本人氣過江龍海鮮丼 「一丼二食」 秘製鯛魚湯漬飯增鮮味

食海鮮丼最開心就係一次過可以食到好多唔同款嘅刺身，最近有間由日本東京首次開到過嚟東涌嘅海鮮丼店，唔止係一次過，直情係一啖過就食到成8-10款食材添呀！

點做到？因為佢哋嘅丼飯有別於坊間嘅做法，並非一片片魚生鋪面，而係將多種海鮮切碎再混合，砌到成座海鮮山咁，就可以一啖過食到多種刺身喇。日本店品牌經理石川先生解釋呢種做法嘅因由：「可能唔太多人知道，喺好耐之前，日本嘅餐廳會用吞拿魚蓉再加入切碎嘅唔同食材製作員工膳食，而呢種製作方法並唔會喺餐牌度提供。為咗令客人都可以品嚐到，我們將各式各樣嘅食材重新配搭，製作出令客人滿足、新鮮且口感豐富嘅海鮮丼。」

全間餐廳就只係供應4款海鮮丼飯同埋少量飲品，夠晒專一。海鮮嘅份量同數量，會按唔同級別而增加，依次為梅、竹、松，同特上。最輕級別嘅梅，包括有鮭魚子、赤蝦、鯡魚子、象拔蚌、螺肉、魷魚、金槍魚同金槍魚蓉；至於最高級別嘅特上，則再加上增量嘅海膽同鮭魚子，以及紅鱈蟹，鮮味當然就再升lvl啦。

餐廳建議海鮮丼可以「一丼二食」，石川先生透露呢個諗法係源自日本有種「結尾茶泡飯」嘅食法，所以佢哋就構思咗以鯛魚高湯當茶泡飯咁食。

丼飯上枱後，客人可以先將秘製醬汁淋喺海鮮面，然後進食。醬汁係蛋黃醬油，建議唔好落太多，否則後期味道容易偏鹹。另外，由於師傅加入咗青瓜、長蔥等食材，所以啖啖魚鮮香甜味中，亦滲有陣陣清新嘅感覺。

當丼飯食到淨返大約三分一左右，就可以請店員協助，倒入鯛魚高湯、加埋三葉芹、茗荷同柚子皮，變成湯漬飯繼續享用。鯛魚高湯沿用日本秘方熬製，用上數十公斤嘅鯛魚製作。鯛魚先用烤爐慢慢烘烤，然後再放入鍋中，同其他多種新鮮蔬菜、各種海鮮每日熬足8個鐘而成，連調味料都冇加！所以飲落嘅味道濃郁，都係原始嘅鮮味嚟。由於魚湯帶有溫度嘅關係，亦令到成碗飯嘅感覺由清爽變成微溫，完全係另一種口感。不過老實講，有時撈埋晒一齊之後，其實又未必太exactly講得出自己食緊邊款魚生，但有好多種唔同嘅鮮味同口感匯聚就真嘅。

配搭胡麻醬嘅魚生片，建議先食兩片，其餘兩片則可以喺加湯後放入飯中，以湯嘅熱力焯至微熟，口感由爽口變成軟嫩，同樣都係「二食法」。

日本橋海鮮丼 つじ半 TSUJIHAN
地址: 東涌達東路20號東薈城名店倉B1樓B13號舖

文：Kar
相+片：YanYan