港女講日：Text都要有技巧 教你3種回訊息小心機

喺呢個通訊發達嘅年代，想戀情順利發展，傳簡訊係一件超重要嘅事。先唔講訊息內容，單係回訊息嘅速度，已經唔係一件容易掌握嘅事。

最近日本電視節目《Tokio Kakeru》搵來男神山崎賢人做嘉賓，向女生分享男人內心話。其中有位19歲女學生問:「回男朋友簡訊之後，佢好耐都冇覆，到佢回覆我之後，應否秒覆呢?」女生擔心如果秒覆，會唔會令對方覺得自己好煩?又會唔會覺得我係有個好得閒無所事事嘅人呢?

呢個時候山崎表示「我會秒覆對方，亦希望對方都咁樣做」，仲話其實自己想幾時覆就覆，唔駛諗咁多。男人呢方面的確係比女人瀟灑得多!

「回訊息速度」可以唔理，但「內容」就一定要理，因為絕對會影響對方對你嘅印象!以下3個小技巧要熟讀:

1.讚美對方

男人自尊心強，讚美嘅說話多講無妨，不過唔好讚得太hea就咁「好叻」、「好型」，而係要具體啲，好似「之前見你打波時，真係型到震!」、「每次同你傾計，你都會望住對方對眼，我覺得好好」等等。

2.坦率表達心情

當對方請食飯/約會後送你返屋企，講「多謝」係基本禮貌，但會同對方表示「好開心」嘅女生就好少。不如試吓下次回佢「今日可以同你咩都傾一餐，真係好開心」、「可以一齊食好西真係太幸福喇」等等，直接向對方表達你好享受同佢喺埋一齊，唔好咁怕醜!

3.配合對方模式

每個人嘅訊息長度、寫訊息模式都唔一樣。有啲人只會講重點，亦有人會好似寫交換日記一樣咁長篇。與男生開始互傳短訊時，首先要先觀察佢比較喜好邊種模式嘅訊息，適當地配合對方簡訊長度，再配合emoji，增加彼此親近感。

圖片來源：ig@kentooyamazaki