炎明熹無緣自薦 古天樂避談《聲夢》無意揀蟀?

古天樂返港開工,不忘追睇東奧賽事。
古天樂返港開工,不忘追睇東奧賽事。

向來樂於提攜新人的古天樂昨日出席活動,出奇地避談《聲夢》,而同場3位「新人王」炎明熹、姚焯菲鍾柔美亦與他擦身而過,無緣趁機自薦拍戲。

古天樂、無綫《聲夢傳奇》學員炎明熹、姚焯菲、鍾柔美、何雁詩及蘇皓兒等,昨日到尖沙咀出席揭幕活動。席上3位《聲夢》「新人王」炎明熹、姚焯菲及鍾柔美與電影公司老闆古天樂擦身而過,未有機會傾偈,錯過自薦機會。古天樂受訪時表示有看過《聲夢》,但問到會否邀請學員拍戲以及對哪位最有印象時,他即避談:「再講啦。」

開工都要撐港隊

拍攝電影《掃毒3》的他最近由內地返港,透露將在港繼續開工,問到夏天開工可應付得來?他說:「頂得順,再熱啲都試過,以前夏天拍古裝都係咁,不過真係要飲多啲水,唔係好易中暑。」又指開工期間有睇東奧賽事撐港隊,對港隊的好成績感到喜出望外。

至於炎明熹受訪時表示席上有見到古天樂,但沒有傾偈。問到可有覺得錯過了自薦拍戲的機會?姚焯菲說:「有機會都想拍戲,因為對唱歌有幫助。」講到《聲夢》3場演唱會已爆滿,炎明熹稱欠下一身飛債:「好多人叫我買飛,但係我哋自己都冇乜飛,好似大家夾埋得幾十張。」

另外,離開無綫回復自由身的何雁詩,透露下周會起程與老公鄭俊弘(Fred)去美國度蜜月一個月:「都擔心疫情,今次係趁Fred去美國登台,我哋提早一個月出發,計劃嗰陣嗰邊疫情未咁嚴重,依家行程有少少改變。」

《聲夢》一眾學員都有出席活動,夠晒熱鬧。
《聲夢》一眾學員都有出席活動,夠晒熱鬧。
蘇皓兒着短裙大晒長腿。
蘇皓兒着短裙大晒長腿。