為個仔戒賭 尹光試過一晚賭輸一層樓 但係用5蚊追到老婆

早前有人以AI技術惡搞尹光，用佢嘅聲線「翻唱」姜濤嘅《Dear My Friend,》同林家謙《一人之境》，深受網友歡迎。尹光亦都食住個勢，將於11月舉行紅館個唱。「光B」早前為蝦頭（楊詩敏）同連詩雅主持嘅網上節目《絲打圍爐》做嘉賓宣傳開show之外，仲自爆當年曾經爛賭嘅經歷。

尹光喺節目中提到網上有人稱佢係「香港十大爛賭」之首，又承認1979年時試過喺澳洲賭牌九時一晚輸廿幾萬，以當時樓價計足以買到一層樓！到1984年大仔出世，尹光有意戒賭，有次同人賭十三張，「光B」憶述已經賭輸4萬5千蚊，於是再向頭家借多5千。對比當時尹光唱一場演出250－300蚊歌酬，條數好大！於是「光B」求神拜佛「救得返我就戒賭」，結果真係搏到逆轉勝，仲倒贏二三千，自此佢決定戒賭。

輸錢可以好豪氣，但係尹光追太太李麗儀原來只係用5蚊就得手。尹光話太太當年都係唱歌，兩人因此認識仲一見鍾情。有次尹光同李麗儀一齊去元朗演出，李睇中一隻5蚊嘅手鈪，尹光正好袋裡有10蚊，於是買下女神心頭好，後來當然追求成功，並於1982年結婚。

1991年尹光首次登上紅館，成為佢事業嘅轉捩點，令佢由廟街同酒廊走上大舞台。但原來「光B」話當時夜場演出減少，曾經喺越南生活嘅佢轉行做買貨，將貨品交俾阿哥運到越南轉售圖利，十幾日可以走一批貨，每轉可以賺一千蚊美金。做咗幾個月，「演唱會之父」張耀榮當年為某歌手舉行10場個唱，殊不知做咗7場就冇做，張生向來欣賞尹光就邀請佢做埋嗰3場檔期。不過尹光個唱銷情，開頭2星期只係賣得幾百張飛，嚇到佢想縮沙退訂畀張耀榮，但張生冇所謂亦冇取消個show。到開show前幾日，銷情都係得2千幾張，但到正式演出日下晝，光嫂話紅館外排隊買飛人龍打蛇餅，賣飛賣到過咗開show時間嘅9點先停，總共賣咗8千幾張飛。後來尹光喺1991年三度登上紅館，成為一時佳話。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！