為初戀錯失父親最後一面 吳耀漢：其實只係性愛滿足

吳耀漢出身富貴之家，父親吳海霖是九巴及九龍殯儀舘創辦人之一，有四房太太，他是二房孻仔。雖然是富二代，但生母於他7歲時離世，周旋於16兄弟姊妹中的他，經常被欺負，佢接受《蘋果》專訪時話︰「媽咪死後，我歸大媽管，但佢一啲都唔錫我，好冷漠。其他兄弟姊妹亦對我唔好，我得唔到任何照顧。7歲就寄宿，就算周末可以返屋企，我都寧願留喺學校釣魚。」

他在15歲被送到英國寄宿，同樣受盡欺凌，惟有寄情於電影世界。他無奈地說︰「嗰陣好孤獨，一個人離開香港去到陌生環境，身邊全部事物都係挑戰，你只能用自己思維去解決。嗰邊好少中國人，啲鬼仔見你人丁單薄，梗撩你、蝦你。」

由於自小缺乏愛，吳耀漢19歲時與一名洋妞一撻即着，更不理父親反對而結婚。父親氣得立即「斷糧」不再匯款給他，吳耀漢寧可自己打工，自食其力︰「你睇死我，向我挑戰吖嘛，咁做人一係就輸一係就贏，一係就克服困難向前行，呢個係我人生好寶貴經驗。」當日吳耀漢認為父親專制，但現在他亦承認有錯︰「佢有退一步叫我返去幫佢打理生意，但我過唔到自己嗰關，嗰陣覺得好愛個女仔，初戀嘛！其實只係性愛滿足，唔係真正愛情，半年後就離婚，嗰陣至知老竇反對，係老人家嘅智慧。」可惜就在這短短半年，吳父離世，當時他半工讀，連機票都買不起，未能返港送父親一程。

一年後，他才從大哥口中知道，原來父親用他的名義買下不少物業及股票。之後吳耀漢在英國咸斯特戲劇學院攻讀戲劇，畢業後為英國廣播公司主演4部電視喜劇，並認識了現任太太。有感在外國華人發展有限，吳耀漢70年回流︰「我雖然讀番書，但好注重中國傳統，70年我回流返港，我都要老婆喺我三位媽咪面前逐個下跪斟茶。以前大媽至叫媽咪，我親生嗰個都係叫阿姐咋，跟住就三姐、四姐，呢個係我自細教養。」

吳耀漢76年投身電影圈，80年代因為《奇謀妙計五福星》等「福星」系列電影而大紅大紫，當時已經被指身家過億。他笑說︰「曾經有段時間，我荒謬到有兩架勞斯萊斯，又Benz呀咁，79年喺銀線灣買咗楝別墅，80年代簽德寶，當年3年6部戲，每部片酬100萬，最後拍咗11部。當時清水灣、西貢別墅約100萬，我拍一部戲買一棟，租晒畀啲飛機師。」

吳耀漢拍了過百部喜劇，他覺得拍福星片最有火花︰「嗰陣成班人開工，就係有呢個火花，大家都會不斷創作，拍嗰陣我自己都笑死，我哋度都好笑，拍出嚟不得了。觀眾好易被感染同代入到我哋嗰種大癲大肺。」最近他與洪金寶及林敏驄在賀歲片《如珠如寶》演出，他自言重拾當年感覺：「阿驄係編劇、導演又係演員，所以現場可以撞橋，俾我好大創作空間，有時會成個劇情重改晒。」