【為藝術犧牲】藝人為演戲搏到盡（增肥篇）

有時見到啲演員暴肥或者暴瘦，都會成為大家嘅焦點，擔心佢哋嘅健康出現問題。其實好多時演員都唔係自我放棄，佢哋係為咗角色而去到好盡。演員好多時都因角色需要而親身參與危險動作，有時仲要為角色快速增肥或者減磅，有機會危害身體健康。今日就同大家睇下有邊位明星曾經為藝術犧牲而去增肥啦！

任賢齊

現年52歲嘅任賢齊（小齊）由今年初開始為新戲角色努力增肥，佢一日食足6餐，多量多餐，由160幾磅增肥到220磅，腰圍達40吋。慘變「油膩的大叔」嘅小齊就話為咗增肥所以連做運動都少咗，因為成日食消夜嘅關係，佢搞到胃酸倒流。除此之外，醫生仲驗到佢有三高。

張建聲

憑《反黑》飾演招積一角爆紅嘅張建聲，原來唔止一次為角色而增肥。喺15年電影《壹獄壹世界：高登闊少踎監日記》飾演奸角呂文積，為配合角色喺10個月內由148磅谷肥至202磅，之後佢又用3個月時間減返。早前，佢又要為飾演電影《真 ‧ 三國無雙》中嘅張飛而增肥，雖然冇上一次咁多，但都要增肥15磅。

胡杏兒

港姐季軍胡杏兒喺06年為劇集《肥田囍事》飾演肥妹仔肥田，佢唔想靠化妝，所以喺短期內激增42磅，由110磅增至152磅。去到而家肥田呢個角色仍然深入民心，證明當年胡杏兒嘅努力係冇白費嘅！

胡諾言

除咗胡杏兒之外，已經係3孩之父嘅胡諾言，當年都有為劇集《肥田囍事》增肥，本身130幾磅嘅佢同樣喺短時間增40磅。胡諾言就話增肥唔係想像中咁易，因為佢增得慢，最後要靠飲營養奶先可以達標。

劉浩龍

喺13年師兄劉浩龍為HKTV劇集《第二人生》喺1個月內增肥咗20磅，當時為求盡快達標，增肥期間暴食，搞到心臟及血壓都有問題，仲搞到要定時食藥，好彩經治療後已經康復。

陳靜

憑標致外貌加上34E好身材而上位嘅陳靜（Dada），早前竟然作出大犧牲，為喺一部女性主義電影飾演單親媽媽而增肥20磅，因為拍咗肥嘅部份先，所以Dada仲要喺1個月內減返二十磅。

張繼聰

張繼聰喺下年2月就會開拍新電影，戲中佢會飾演拳手，為配合角色佢需要增磅，體重由145磅增加至180磅，由M碼變着XXL碼，之前練出嚟嘅人魚線都要暫時消失啦！

江若琳

今年年尾就會榮升做人妻嘅江若琳（Elanne），當年憑人靚聲甜俘虜唔少網民嘅心。12年江若琳亦試過為愛情電影《高舉·愛》中飾演舉重選手而增肥30磅。Elanne就話嗰陣時日日食到想嘔，試過1日5個漢堡包、飲增肥奶粉、乾炒牛河做消夜。

郭晉安

阿旺應該係郭晉安演過嘅角色入面，最令觀眾留下深刻印象。佢先後為劇集《戇夫成龍》及《阿旺新傳》嘅「阿旺」增肥，每一次都20幾磅，未增肥前佢嘅平均體重大約145磅，佢要一日食好多餐去增肥，增肥後幾高峰可以去到170幾磅。

鄭中基

一向瘦底嘅鄭中基（Ronald）俾人嘅感覺係唔識肥，但佢今年要配合電影《救贖》飾演船廠工人而增肥20磅，明顯大咗一個碼。

吳鎮宇

上映中嘅本土電影《逆流大叔》，唔少人睇完都話好感動，口碑票房節節上升。唔知大家有冇留意到吳鎮宇喺戲中大咗一個碼呢？原來佢為咗中年單身男阿龍呢個角色，除咗將髮型變得蓬鬆之外，佢仲增肥20磅去配合角色。佢每日飲豬肺湯做早餐兼要食煎糯米雞，令原本140幾磅增至高峰163磅。