烤魚關注組5大推介！$70起嘆正宗川味熱爐烤魚

OpenRice開飯喇
更新日期：

冬天除咗打邊爐之外，對鍾意海鮮嘅朋友嚟講食烤魚都係個暖身嘅好選擇。開飯仔今次就精選其中五間喺網上烤魚關注組得到好評嘅烤魚店，唔少都有推出優惠套餐或者一人餐，最平嘅$70就食到啦！

元朗旺角人龍店 烤魚工房

能夠開喺元朗同旺角而Keep住有人龍排隊，靠嘅係即叫即燒嘅烤魚，同喺四川空運到港嘅底料，有食評更指風味同內地名店幾似！烤魚有七款口味選擇，最推介招牌毛血旺口味或者香辣豆花口味配無細骨嘅江團魚。唯一可惜係繁忙時間限時90分鐘，食得有啲趕。

香辣豆花烤魚（圖: Kan Lee）
香辣豆花烤魚（圖: Kan Lee）

食勻烤魚+雞煲+串燒 4號烤吧

烤魚餐廳有埋火鍋或者雞煲唔出奇，不過好似呢間餐廳咁賣埋串燒就少啲。懶得諗食咩好嘅話堅尼地城分店有大豐盛套餐，有齊自選烤魚、香口小食、串燒同飲品。烤魚有六款口味，當中以招牌重慶豆花烤魚最受歡迎，配料多而且煮得夠入味。

重慶豆花烤魚、串燒（圖: HoichingChan8642）
重慶豆花烤魚、串燒（圖: HoichingChan8642）

$78起一人烤魚火鍋 巴辣仔烤魚雞煲

烤魚通常都係原條大大份，約唔到朋友就食唔晒？唔怕！呢間喺九龍同新界都有分店，由成都名廚主理嘅四川菜餐廳就推出一人烤魚火鍋！五款足一斤活魚選擇，有辣有唔辣，甚至可以嗌埋配料例如肥牛、雞腎花、鴨血等，真係一個人原來都可以盡興。

（左）一人烤魚火鍋（圖: KimmyLi666），（右）原條沙巴龍躉烤魚（圖: Katrinaaa_）
（左）一人烤魚火鍋（圖: KimmyLi666），（右）原條沙巴龍躉烤魚（圖: Katrinaaa_）

抵食精選套餐 漁不老烤魚雞煲火鍋

呢間主打烤魚同火鍋嘅餐廳喺尖沙咀同荃灣都有分店，尖沙咀店更不時有Live Band演出，三五知己一齊去食更有Feel，而且用OpenRice餐飲券可享精選套餐91折優惠！套餐包括自選前菜、招牌菜、海鮮、肉類、配料，而佢哋嘅原條烤魚用嘅香料更大部分都嚟自四川。

原條泡椒烤江團魚（圖: urfoodbuddies）
原條泡椒烤江團魚（圖: urfoodbuddies）

$70烤魚Lunch Set 台灣館

上文介紹嘅大部分都係四川菜餐廳，估唔到牛頭角呢間台灣菜餐廳都有得食烤魚，而且午餐時段麻辣烤魚更只係$70！雖然唔係原條上，但套餐包埋白飯同飲品，烤魚亦用熱爐奉上，連埋筍絲、芽菜、蓮藕片、唐芹、黑木耳等配料，CP值真係唔錯。

麻辣烤魚（圖: Ritakitty）
麻辣烤魚（圖: Ritakitty）

文: Cathy.H