王君馨離巢TVB 北上參加跳舞選秀節目追夢
王君馨(Grace)喺上年12月與無綫結束14年賓主關係,宣布正式離巢,唔少網民除咗認為係TVB嘅損失之外,亦非常關注佢嘅去向。王君馨之前曾經話過無論係唱歌、演戲定係跳舞,佢都唔會停落嚟。早前有傳王君馨將過檔ViuTV,不過近日就被爆出佢已經北上發展演藝事業,仲指佢將參加內地跳舞選秀節目《了不起的舞社》,並疑似會組女團出道添呀!
《了不起的舞社》係一個女子團體跳舞選秀節目,搵嚟蘇有朋主持,及由王霏霏、李永欽、贊多等人擔任舞團領隊,雖然節目嘅參賽者名單仲未正式公佈,不過節目嘅花絮已經陸續流出。而王君馨近日亦不時上載與唐莉佳及北京Triple-S舞室隊員肖恩(Shawn)一齊跳舞嘅影片到抖音。除此之外,王君馨亦喺社交網站上載一張喺上海外灘嘅夜景照,並寫上:「New Challenge Awaits #繼續挑戰自己 #為夢想努力奮鬥」。
現年35歲嘅王君馨,喺2007年參選《全美華埠小姐》獲得第一公主(亞軍),同年參選《香港小姐競選》獲得亞軍,而且仲獲得最上鏡小姐同國際親善小姐。加入無綫後,王君馨主要向演戲方面發展,多年嚟佢參演過唔少劇集演出,例如《刑警》、《熟男有惑》及《My盛Lady》等等。一直默默耕耘嘅Grace,喺16年終憑《城寨英雄》飾演花曼一角人氣急升,再於2018年喺劇集《是咁的,法官閣下》首次擔正做女一。去到今年,王君馨喺《鐵拳英雄》飾演十二路潭腿高手程安娜,繼續冇令觀眾失望,使出硬橋硬馬真功夫,武打場面及演技獲得大眾盛讚。
近年Grace更邁向跳唱歌手之路,先後推出《Casada》及《尖叫》成為樂壇新人。另外,一向跳得嘅佢喺上年《盛·舞者》擔任「盛舞導師」,當時獲唔少網民大讚佢跳舞時非常有型。上年12月,Grace宣布離巢TVB,近日被指佢參加內地節目《了不起的舞社》,唔知佢有冇機會加入跳舞女團呢?
按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可換領限量新人禮,立即下載!