當沈大師不再燈

沈大師近期幫某大輪商拍的廣告相當「吸睛」，廣告中只見沈大師以一代宗師打扮登場展示詠春修為，繼而打出廣告口號「有燈就有人」。牌面睇係呼應《一代宗師》的經典對白，但大家亦會疑惑，廣告似乎明示大師「燈力」驚人，找他拍投資產品廣告是否倒米?

要拆解此疑團可以從正、反兩方面入手。從「正面」角度看，假設沈大師確係估多錯多的明燈，散戶以此套路解讀他的預測，再以逆向部署買輪的話，理論上可以長賺長有。既然網絡上仍有不少散戶深信大師是燈神，輪商找大師拍廣告，確實可以發掘大批打算與大師對著幹的潛在購買力。

不過股海變幻莫測，昔日被封為燈神的大師，近大半年預測越來越準，特別係睇淡恆指及股王騰訊更是中完又中，加上有大師好友羅尚沛及黃國英唱好騰訊卻又不斷落空的分析作曲線助攻，令越來越多散戶對大師改觀，甚至認為在熊市下，大師已蛻變為「老師又中」的真明燈。

要知道玩輪最怕牛皮市，現在港股受貿易戰及新興市場貨幣危機夾擊，不時出現大回調，正是玩輪的好時機。在此情況下，擅長唱淡的大師，確實可以發揮「有燈就有人」的號召力。

大師的精妙之處，在於不會令自己熄燈，有時大師雖然係淡友，但近來當港股及騰訊勁跌時，他又會拋出跌過龍應該會反彈的預測，妙在此套路的預測通常都「中」，散戶聽得多，亦可能會自動自覺按此套路買輪賺快錢。所以輪商找大師賣廣告，不單唔係傻仔，而且相當精明。

(沈大師廣告截圖)

其實，本地股壇燈神不獨大師一人，孫柏文「燈力」在不少散戶心目中可能更勝大師，但成功以「明燈」形象吸金的唯獨大師一人，此成就又確實值得大家佩服了。

===============

財經精選資訊網站「中環街市」 臉書粉絲頁