《白色強人》韋家雄手術期間講電話 原來係現實生活改編

今年無綫皇牌劇集之一嘅《白色強人》搵嚟郭晉安、馬國明、李佳芯、唐詩詠及蔣志光等好戲之人主演，劇集以一向有收視保證嘅醫療題材作為背景，主要講述醫生救急扶危、醫院權力鬥爭及探討埋醫療改革問題，當中仲有以現實生活改編，所以劇集播出以嚟經常成為網上熱門話題，好似韋家雄飾演嘅心胸肺外科醫生喺做手術期間傾電話，仲喺未完成手術嘅時候離開手術室，好彩有德仔（何廣沛飾）化解危機，病人先可以平安無事。

喺星期一播出嘅第六集，劇情就講到心胸肺外科醫生Hugo（韋家雄飾）喺做手術期間多次同老婆傾電話，話題就係仔仔去星加坡升學問題，Hugo反對老婆嘅決定，所以心情已經麻麻，當時德仔同Ceci（馮盈盈飾）已經覺得愕然同不滿，不過又阻止唔到Hugo。喺手術差唔多完成嘅時候，Hugo竟然拎咗部電話出手術室講電話，縫線嘅工作就留俾德仔去完成。期間病人情況突然有變，佢哋想叫Hugo返手術室，不過好彩德仔有經驗同識得點樣處理，病人先可以平安無事。事後，Hugo想德仔幫佢隱瞞真相，德仔亦都答應幫佢，不過Ceci就好睇唔過眼，仲話如果有人問佢一定會講出嚟，因為Hugo講電話呢個行為係罔顧病人生命，醫療失德。

真人真事係發生喺1999年5月，瑪麗醫院嘅外科醫生董曉明幫病人進行大腸內窺鏡檢查，並發現病人喺盲腸、乙狀結腸及結腸曲有三粒瘜肉，需要即時進行切除手術。而喺手術期間，病人就發現佢用免提式裝置傾電話，期間仲講到買車事宜。之後，手術後當晚病人就因為腹痛入咗醫院，原因係結腸左曲爆裂，需要做結腸縫補手術。手術後，病人大感不滿，於是將事件公諸於世。喺2000年3月，瑪麗醫院就進行內部人事紀律聆訊，最終裁定董曉明醫生行為失當，判五年冇得加薪同埋升級。