童你一起長大了︳Jay姐姐梁詠琳曾介入夏韶聲婚姻 回美國療傷後覓真愛

TVB節目《童你一起長大了》每集都搵到多年冇見嘅兒童節目主持做訪問，最新一集就搵咗「Jay姐姐」梁詠琳。

梁詠琳係第一代《閃電傳真機》主持，主要演「叉燒包與漢堡包」嘅「漢堡包」，不過更多人識嘅可能係佢首經典兒歌《如果一打》！八十後一定識唱！

今年52歲嘅梁詠琳喺美國長大，1988年參加新秀歌唱比賽而入行，同屆冠軍係譚耀文，季軍係鄭秀文，入圍嘅仲包括鄭伊健、馬蹄露同趙學而等。後來梁詠琳簽約TVB，成為《閃電傳真機》主持，再被調去戲劇組拍劇，演過劇集《烈火雄心》、《娛樂插班生》等。

Jay喺TVB發展平平，仲一度被安排做「御用壞女人」，反而戀聞方面更精彩。梁詠琳同何寶生拍過一年拖，後來何寶生鑽研佛理並削髮出家。梁詠琳拍攝《刑事偵緝檔案》而同已婚嘅夏韶聲擦出火花，雙方當然否認，只承認係傾得埋嘅朋友，仲一齊開公司搞音樂市場推廣。殊不知喺2001年爆出梁詠琳同夏韶聲有金錢糾紛，女方仲話俾人呃，但係梁詠琳後來又澄清只係溝通有錯。梁詠琳同夏韶聲嘅「友好」關係喺2003年終結。

有傳梁詠琳因為情傷而患上情緒病，決定返美國生活，並喺大公司工作，本來決定唔返香港嘅Jay偏偏因為要到內地出差而路經香港，佢會趁有時間同當年拍檔譚玉瑛、黎芷珊聚會。2018年梁詠琳克服情傷同拍拖7年男友結婚。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！