紅館騷重啟賣大包 張敬軒:冇錢收我都開心!

張敬軒狀態大勇,準備下月開騷。
張敬軒狀態大勇,準備下月開騷。

張敬軒的16場紅館騷即將重啟,雖是補場性質,但軒仔「賣大包」唱多8場,他不敢跟公司傾錢計數,揚言就算「零」歌酬亦同樣Happy,因為今次再踏紅館舞台的機會得來不易,他非常感恩。

張敬軒紀念入行20周年的紅館跨年演唱會,下月將會重啟,因防疫條例限制入座人數,剩餘的8場補場變成16場,他將要消耗多一倍體力應付,但表示未有跟主辦方商討歌酬問題:「成個表演行業都係一個生態,我實在冇辦法喺疫情情況下再要求番以前嘅做法。今次我係完全冇同公司提及過關於歌酬嘅嘢,反而依家有得做番個演唱會,我會盡全力去做,攞番自己嘅狀態出嚟,去報答番舊年已經買咗飛嘅所有觀眾,就算冇錢收我都開心!」續指疫情下要做16場演唱會,他、主辦方與觀眾都不容易,所以會好好珍惜今次的機會。

備戰狀態褲頭鬆

不少人因為疫情而宅在家中變肥,問軒仔可有管理好身形?演唱會服飾是否依然合身?他說:「我開騷同人哋有啲唔同,因為我演唱會期間,喺飲食各方面都會減少,所以喺過去2、3年嘅演唱會前,冇再好似以前咁去操、用減肥嘅方式去預備開騷,反而係均衡飲食,同埋保持足夠嘅休息,每日都Keep住、或者焗住自己瞓夠8個鐘,但又唔會超過8個鐘。」

軒仔在疫情期間冇肥冇瘦,全因夠自律,他說:「我都要為演唱會可能重開做準備,就算2、3月疫情最緊張嘅時候,我都要為咗個唱重開作打算,所以冇畀自己鬆懈,保持住2、3kg上落嘅體重,啲歌衫應該唔係問題嘅,加上近期我進行番『168斷食法』,反而褲頭仲有少少鬆添!」他覺得今次體能及各方面壓力都比以往的演唱會高:「係真嘅,今次個騷有好多情緒嘅功課,因為呢幾個月都有啲體會,更加畀自己人生方面一啲提醒。我哋要活在當下,把握好每一個當下時刻,當擁有觀眾愛錫嘅時候,就盡自己最大嘅能力做好佢。」

張敬軒盡全力做好紅館騷,報答所有觀眾的支持。
張敬軒盡全力做好紅館騷,報答所有觀眾的支持。



我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能