純粹港嘢：好巴打有時比親巴打更親

朋友A個囝囝今年3歲，雖然佢成日話照顧小朋友好辛苦，但又心思思想追多個。因為自己係獨生子，A覺得人生有兄弟姐妹應該係一件美好既事，希望有多個細佬／細妹陪阿哥。

作為人地家姐既我即時忍唔住問佢：「你有冇問過阿囝意見架？」

A：「要問架咩？有多個伴陪佢無咁悶嘛。」

我：「如果你地係自己想要多個B就生，若言純粹為左陪阿囝，就要考虑其實佢想唔想要。」

A同好多父母一樣，覺得屋企得一個小朋友佢地會悶，需要有個差唔多年紀既兄弟姐妹陪，但呢個諗法有時可能好一廂情願，或者小朋友本人根本無呢個需要。好似內地近年開放左二胎政策後，就有好多關於小朋友堅持想做獨生子女既報導。其中最嚴重既係有個細路知道媽咪懷左二胎後，以死相逼，最後成功逼媽咪墮胎。

（圖片來源：https://hk.news.yahoo.com/13-083948406.html）

A聽完後呆左：「下？小朋友會咁大反應架咩？」

我：「其實而家好多細路有得去play group，平時又有表兄弟姐妹或者朋友既小朋友陪玩，真係未必會悶，或者覺得需要一個細佬妹。相反對好多小朋友黎講，佢地會擔心有左細佬妹之後，會分薄左父母對佢地既愛、時間同關心。」

A：「但阿囝而家得個3歲，都未必知自己想唔想要細佬妹喇。」

我：「如果你決定生多個，就要記住呢個小朋友係你地既責任，唔係阿哥既責任，當兩個小朋友有矛盾既時候，真係要做到對事唔對人，唔好因為年紀，就要大個個就細個個。對於阿哥或者家姐黎講 『你做大既，讓下個細架喇』真係難聽過粗口。」

正所謂「一世人兩兄弟」，好多人都覺得親巴打一定會感情好好，第時有咩事大家有個兄弟可以互相照應。但呢個可能只係美麗既幻想。

現實生活中，同一個家庭既兄弟，可能除左血緣關係之外，大家係生活同性格方面根本唔夾。但兩個人會被親情道德綁架，大眾普通認為只要對方係親兄弟，無論大家關係點，彼此都有互相幫助既義務同責任。

但如果跳出黎停一停，諗一諗，血緣關係可能只係一種緣份，即係兩個人曾經有緣住埋同一個子宮。但唔代表會自然成為好巴打或者好姐妹。人世間真正既情義應該係一種主動既選擇，唔係被動既義務。

生命裡真正既好姐妹、好兄弟，可能完全無血緣關系，但大家有共同既價值觀、興趣、理念同經歷。我對你好，唔係因為你係我親巴打，而係因為你係一個好巴打。對我而言呢種緣份，比血緣更加深厚。

純粹思考題：到底兄弟姐妹，應唔應該純粹因為「親情」呢一層血緣關系，對彼此既人生有需要幫助或照顧對方既責任？

text / Diana CHIU