純粹港嘢：比起新功能，我更想 Whatsapp 取消的舊功能

Whatsapp陪伴左香港人好多年，現時仍然係香港人日常生活，以致工作上最主要既通訊工具，但其實比起Whatsapp，我真心覺得微信更加方便好用。雖然Whatsapp近年不斷改善，增設好多新功能，例如「改變字體」、「GIF動態圖片功能」同「引用回覆」，但老老實實，睇緊呢篇文既你，有幾多人經常會用到「改變字體」呢個功能？「引用回覆」又係咪真係會令大家溝通時方便左？

先唔講新功能有冇用，我真心唔鐘意佢出道出今有過，仲保留緊既幾個舊功能：

1.無法隱藏的「在線上」

過去既ICQ、MSN同SKYPE都不約而同有一個在線隱身功能。比用家係需要睇MSG，但又唔想被人打擾，唔想回覆時，可以默默地online靜靜地走。

但係Whatsapp既世界，係無呢方面隱私的，只要你打開Whatsapp，所有通訊錄裡面既人都會見到你「在線上」。朋友A就因為呢個功能賴過野：佢自以為好醒地熄左「已讀藍剔」功能，奈何佢唔想覆老細MSG同時，一定要覆女友MSG。於是就佢老細見到佢online，就質疑「點解你在線上，又唔睇唔覆我MSG？」

唔知你有冇遇過一D好煩既上司/客戶，佢地專門係你在線既時間問你野，就算係非辦公時間，當你證據確鑿地被見到「在線上」，就算個心幾唔願意，基於禮貌都要被迫覆對方，唔可以扮睇唔到個信息。

所以呢個功能真係好煩，當見到一個極度唔想覆，同一個一定要覆既msg時，真係會逼到用家連開唔開 Whatsapp 都要停一停，諗一諗，覺得無奈。

2.點解要比佢方見到我「輸入中」

同「在線上」一樣，呢個係無得關閉既功能，只要打緊字比某人，某人就算唔click 入同你既對話框，都會見到你「輸入中」。

但唔知閣下有冇試過一個情況：心思思想send msg比前男/女友，但打字打到一半，最後決定唔send？於是就會出現一個情況，即使你最後忍住無 send 個 msg出去，但對方好有機會見到你曾經「輸入中」。

對於見到對方「輪入中」，最後又無收到 msg 既人黎講，呢個功能同樣會令人困擾。因為作為一個有好奇心既人類，你一定會忍唔住諗，到底對方想同我講咩？點解最後又無講？

所以真係好想問Whatsapp 既研發人，點解要比對方知道我地「輸入中」呢？點解要設定一個引起人類互相猜忌既功能呢？

3.會比對方質疑你點解要關閉既「已讀藍剔」同「最後上線時間」

相信係使用Whatsapp初期，好多情侶，什至朋友都可能因為「已讀藍剔」同「最後上線時間」呢兩個功能鬧過交。雖然而家新版既Whatsapp可以比用家自由選擇開啟，定關閉呢兩個功能，但總會有人好似我朋友 B 咁唔好彩，遇到個疑心重又癡身既男友：

B以前從來無為意呢個功能，直至同男友拍拖後，成日被對方問佢點解已讀不回，尋晚點解又咁夜訓之類，B覺得好煩就熄左呢兩個功能。然而咁樣反而令佢男友更嬲，開始追擊B，不斷問佢係咪有野想隱瞞，點解無喇喇熄左呢兩樣野唔比佢睇。

唔知幾多人同筆者一樣，係Whatsapp推出可以查閱Group MSG邊個睇左呢個功能時，內心覺得十級無言。（甚至連連方邊日幾點睇都有詳細顯示）

因為Whatsapp上述呢堆功能，我真心覺得與其話佢係一個communication apps ，不如話佢其實係一個stalk apps。如果Whatsapp既團隊有機會睇到呢篇文，認真的，可唔可以考慮取消上述呢D令人覺得好無私隱既設定？

純粹思考題：到底Whatsapp「在線上」、「輸入中」、「已讀藍剔」呢堆功能，會令用家彼此溝通時更多了解定誤解？

TEXT / Diana CHIU