純粹港嘢：用止汗劑堅係一種社交禮儀

唔知有幾多朋友試過係一個封閉式空間，遇到一個混合住複雜體味既人，你走唔到，避唔開，焗住聞，覺得自己疑似中左生化武器，難受到想爆粗，然而只能啞忍。我試過，我真係試過。每一次面對呢D時刻，我都好想直接問對方一句：點解你唔用止汗劑？

呢個問題第一次係我腦海出現，係中學。隔離位個女仔性格開朗，幽默健談，個樣又可愛，樣樣都好，唯獨有臭狐。可能佢自己都感受到，所以會成日噴香水。但聞過既人都知道，香水其實遮唔到臭狐味，加上佢噴髮膠既味道，上完體育堂既汗味，個種「百般滋味在一身」既感覺⋯⋯我到而家諗返起都猶有餘悸。每次返埋位坐係佢隔離，我都覺得無辦法專心上堂，爭扎左好耐，我決定鼓起勇氣，係佢生日送左支止汗劑比佢。結果，佢嬲左我，好明顯支止汗劑佢亦堅持唔用，我忍者咁忍到調位之後就無下文了。

然而命運之神並無因此而放過我，大學時期其中一任室友本身無問題，但佢男朋友堅臭。臭到點？只要佢每次黎我地間房，我未開門，隔住道門已經聞到佢黎左，我同呢個室友做唔到朋友，可能因為覺得佢男友太臭，佢每次黎完，我係房間聞住久久不能散去既狐味，都覺得自己好委屈。

相同既情況不斷發生係生命裡面，有體臭但堅持唔用止汗劑既人比我想象中多。搭電梯算最好彩，如果層樓唔高，努力閉氣其實勉強挨到過去。係地鐵遇到的話，我已經學精左，寧願選擇落車等多班車，都唔想繼續臭足成程車。但最慘係搭飛機遇到，尤其長途機，係避無可避既情況下，我唯有不斷拎支薄荷膏出黎聞。但一路聞一路個心好嬲，內心咆哮左無數次「點解要我聞薄荷膏！而唔係你搽止汗劑？」當然到最後，我只能默默啞忍，唔係點？唔通同空姐講，隔離位好臭我想調位啊？（假如呢個原因堅成立，可以因此調到位，麻煩航空界既朋友留言話我知）

呢個世界無人想阿媽生成有臭狐，人人都會出汗，我也不例外，我絕對唔歧視任何有體味既人，但真心鄙視明知一眾自己有味，但堅持唔用止汗劑既人。

你可以話的身體係我既，我覺得自己陣味無問題，唔鐘意用止汗劑有咩問題？

有！絕對有！根據《人權宣言》裡面對自由的定義：「自由即有權做一切無害於他人的任何事情。」注意！你有自由做任何野，但大前題係無害於他人。當你選擇左群居生活，你會帶住你陣味行出街遇到人，你就已經影響緊其他人。無人有責任同義務承受你的體臭。遇到不能避開的臭味，真係會對別人構成好大困擾。你有體臭，但選擇唔用止汗劑，其實等同剝奪左你身邊既人呼吸新鮮空氣既權利。

夏日將至，好想呼籲一眾有體味既路人，有D公德心，或者當有D同情心，體諒下我地呢班要朝9晚5逼地鐵既打工仔，拜托⋯⋯用止汗劑好嗎？

純粹思考題：如果遇到一個各方面條件都好好，你都好鐘意既異性，佢唯一既缺點係有體臭而堅持唔用止汗劑，你接唔接受到？

text / Diana CHIU