純粹港嘢：致那些被大陸市場養到懶哂嘅品牌經理

睇到Lancôme的關公災難和何韻詩的處境，好想問一句：冇左大陸市場係咪會死？

大陸係大，有13億人口，其中有好多啲錢都唔知邊到黎既土豪。能夠賺到人民幣，對每個企業黎講，一定係好事，錢唔會有人嫌多。

問題係，好多香港區既品牌經理，係呢幾年都被內地呢塊得來全不費功夫既肥豬肉養到懶哂。以今次關公出事嘅L'Oréal Group為例，過去幾年旗下好多品牌大部份收入唔係靠自由行黎瘋狂購物，就係靠下面既分銷商走貨上內地。近幾年香港區嘅生意額爆增，並唔係因為香港區生意真係好左，而係香港區分左原本屬於內地既sales amount。然而主管們但求跑到數就得，既然淨係靠大陸都到數，又點解仲要辛苦自己做好本地消費市場？

可能過去幾年實在太輕鬆，於是無人會思考其實呢個經營模式好唔合理，亦超唔健康。做過Sales and Marketing嘅人都知，「今年生意好，下年實加數」，公司每年都會按照每個區域上年同期既生意追加今年target。除非經理們非常有信心，內地既客源會繼續來港消費，香港嘅分銷商會一直搵到門路送貨上大陸，如果唔係，佢地必然要面對，有朝一日無左呢筆「不正常額外生意額」後，根本無可能靠正常增長嘅本地消費去數填返中間個差額。

對於過去幾年靠虛火，爆到個生意額不合理地巨大嘅品牌，真心想講一句：撈得咁嘆，預左要還。

我相信同好多其他品牌一樣，大部份黎香港大手買入Lancôme產品既，並唔係真正用家，而係靠黎香港低買，返大陸高賣賺取中間差價嘅職業代購，對於呢班商品界嘅搬運工，我地簡稱水貨客。只要有錢賺，無論佢地內心深處幾咁愛國同唔鐘意何韻詩，其實都會繼續幫襯走水貨。

如果你地擔心嘅係影響大陸市場，我想講L'Oréal Group咁多女人，無可能唔明女人買護膚品同化妝品，真係主要睇好唔好用。如果啱自己皮膚嘅，就算你搵邊個做代言人都好，我地上網鬧完咪又係死死地氣去買。大陸人好多網上話反日嘅人，年中可能去日本勁掃貨。同樣，好多唔鐘意內地嘅香港人，如果係淘寶見到有野啱，又真係會忍到手唔買咩？

集團如果對自己嘅產品有信心，其實唔使靠發表愛國聲明嚟留客。你地真正要懼怕的，唔係內地上網嘈嘈閉班網民，而係長期只靠大陸單一市場生存，如果有朝一日呢個市場唔得，又或者內地出新政策阻止香港水貨返大陸時，你地點算？

表面上睇，人民幣好易賺，但呢碗飯要你放底嘅尊嚴，可能比你想象中仲要多。其實「大陸」只不過係近10年先出現既新市場，未有呢塊新豬肉前，大家本來無飯開咩？點解突然間好似一件產品如果大陸人唔buy，就只能等死？大家係咪忘記左成個亞洲區，或者全球其實仲有好多消費者？Facebook、YouTube等被大陸封左無得入內地市場既企業，不是也發展得很好嗎？事實證明，只要有實力，唔奶共都可以賺到錢。

今次Lancôme嘅案例，實在值得其他同樣只靠內地生意到數既品牌經理好好思考。

純粹思考題：一句到尾、冇左大陸市場係咪真係會死？

text/ Diana CHIU

圖片來源：FB