5大紫薯甜品推介 紫薯火山流漿班戟、紫薯大福

紫薯甜品曾經風靡一時，儲落咗一批紫薯忠粉，直至而家仍然會四圍搵下邊度有新款/好食嘅紫薯甜品，以下幾間你哋又試過未？

唔甜的紫薯蛋糕 Mamaday

食甜品有時最怕就係太甜，呢個紫薯芝士蛋糕睇個名就知主打唔太甜喇！蛋糕表面首先係紫薯蓉，底下係香滑嘅牛乳慕絲，接住係紫薯芝士蛋糕，最底仲有香脆嘅牛油消化餅底，一啖可以食到四層嘅味道同口感，層次好豐富。成個蛋糕滲透微微嘅天然紫薯香甜味，唔會太膩，一個人自己食晒成件絕對冇難度～

紫薯火山流漿班戟 Gram cafe & pancakes

來自日本嘅人氣梳乎厘班戟店，食材有9成都係喺日本運過嚟，如粉漿及忌廉等，所以絕對食到日本嘅味道。紫薯火山流漿班戟好味又啱打卡，一拎開膠片就會有滿滿嘅紫薯醬流出嚟，上層同底層係鬆軟嘅梳乎厘，有空氣感而不失咬口。中間夾住嘅紫薯蓉都好幼滑，配埋紫薯醬食好幸福呀。

紫薯窩夫配海鹽焦糖雪糕 EverShine

一間好細心嘅Cafe小店，除咗有沙律意粉小食，仲有甜品、精緻嘅特飲同埋乳酪碗，每個菜式都會列出營養成分，啱晒體重管理嘅人士。紫薯窩夫配焦糖海鹽和雪糕賣相超級靚，色彩繽紛，窩夫香口而煙韌，切開中間係帶有淡淡焦香味嘅紫薯餡，配搭埋紫薯片、雪糕同水果食好滿足。另外仲有海鹽焦糖紫薯牛奶，真材實料食到粒粒紫薯蓉，加埋鹹鹹地嘅海鹽焦糖就更正！

紫薯流沙煎堆仔 得閒飲茶

估唔到飲茶都食到紫薯呢～呢間主打傳統同特色創意點心，全部都即叫即蒸同即炸。紫薯流沙煎堆仔糯米皮香脆軟糯，帶淡淡紫薯味，流心餡既有鹹蛋黃嘅甘香，又有奶黃嘅香甜，質地都有起沙，兩者味道好夾呀。

紫薯大福 小正大福

人氣大福專門店，供應好多唔同口味嘅大福，每粒大幅都係全人手工製作，外皮係冇油少糖嘅，煙韌控必食！紫薯朱古力大福嘅薯蓉係自家製，味道自然，再加埋法國70%黑朱古力忌廉、法國65%黑朱古力碎粒同埋黑朱古力脆脆珠，加埋外層嘅日本紫薯粉，粒粒都好足料。

文: Yanica