細細粒陳嘉佳意外曝光2千呎豪宅 物業遍布海外 曾自認隱形富婆

陳嘉佳（細細粒）近年轉戰內地擔任「吃播主」，靠食美食及帶貨闖出名堂，高峰時期曾一晚賺800萬，被封「吸金女王」。細細粒將錢花喺磚頭及投資之上，除咗榮升廣州海味舖老闆娘，並喺新西蘭購入獨棟花園別墅，及於中山買樓作投資之用，今年初亦豪擲近千萬購入鰂魚涌大型屋苑送畀媽咪，自己亦以400萬買入名貴跑車。細細粒近年定居杭州，日前佢就拍片分享生活，意外曝光2千呎豪宅。

細細粒拍片分享難得放家宅喺屋企嘅生活；從片中所見，細細粒坐喺一張四人大梳化，前方就係大電視，梳化後就係一張大餐桌及半開房式廚房，亦見到幾間房間均以日式簡約裝潢為主。另外，細細粒走到坐擁翠綠山景嘅廚房開咖啡，之後就到露台歎咖啡，露台位置除咗放到一張小茶几，更有一部跑步機，空間極闊落。

細細粒吸金力驚人，去年曾拍片大曬新西蘭逾10萬呎樓高兩層嘅別墅，更自認係「隱形富婆」，大宅擁有歐式簡約風格嘅主人房及三間客房，細細粒透露平時會喺主人房浴缸歎SPA，底層則設有兩個客廳，分別有桌球枱、客房、開放式廚房等設施。此外，細細粒曾拍片分享衣帽間，有眼利網民發現細細粒衣櫃頂放滿Hermès象徵性嘅橙盒，旁邊亦有數個名牌手袋。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！