美麗40路︳46歲劉明軒曾閃婚閃離 被前夫一年趕走3次 訪問郭台銘被搭膊頭成話題

ViuTV選美節目《美麗40路》以一班熟女參加者為賣點，不過「一姐」陳俞希加埋三位「40路」女主持黃心美、孫慧雪同劉明軒一樣相當省鏡。當中最年長、46歲嘅劉明軒Vivian曾經係「有線女神」，但最為人記得嘅係Vivian嘅情史，緋聞男友個個有返咁上下，仲因為被台灣首富郭台銘搭實膊頭而成為話題人物！

劉明軒畢業於美國南加州大學財務學系，回港後曾於銀行工作，後來考入有線娛樂新聞台成為主播。2007年劉明軒被安排採訪台灣富商郭台銘時，郭一直搭住劉明軒膊頭不時掃下掃下，傳媒報導話郭董抽水，令劉明軒成為新聞人物。入行後劉明軒傳過多宗緋聞，男主角包括恆生銀行合氏家族後人何乃斌。2016年劉明軒同拍拖一年多嘅保險界才俊王傲山結婚，但婚後一年就宣布玩完。Vivian離婚後受訪，自爆婚後唔夠一個月就俾王趕出家門﹐一年內就被人趕走三次，因此決定離婚。劉明軒更直指因為有「更嘔心嘅事」難以忍受，形容前夫婚前婚後兩個人。

而劉明軒最受談論嘅緋聞，可以話係2017年離婚後，被周刊踢爆同曾出任多間大機構高層嘅已婚才俊盧永仁博士，11日內6次前後腳出入跑馬地私竇，甚至被指二人舉止親密。後來盧永仁澄清同劉明軒係生意拍檔，而「私竇」係公司同事屋企，上去只係為咗開會。

去到2019年，劉明軒又被傳媒影到佢同廖碧兒富二代前男友盧啟賢雙雙出現喺酒店。後來二人見完面，盧啟賢就好有風度咁送劉明軒出門口，除咗俾女士行先之外，更以一個goodbye kiss作結。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！