《萬千星輝頒獎典禮2020》龔嘉欣成視后大熱 仲有邊位係網民心水?

·3 分鐘文章

一年一度嘅《萬千星輝頒獎典禮2020》將於下年1月10日舉行,噚日無綫舉行記者會公佈各獎項嘅提名名單。名單公佈後引起網民熱烈討論,而家就同大家睇下網民預測嘅視帝、視后、最佳男/女配角嘅三強人選啦!

最佳男主角:
今屆「視帝」都有幾個大熱人選,佢哋分別係《踩過界II》飾演「盲俠」文申俠嘅王浩信、《使徒行者3》飾演爆Seed嘅林峯及《使徒行者3》飾演大奸角韋作榮/魏德禮嘅馬國明。林峯過往曾經被提名過16次視帝,不過一直與視帝無緣,雖然今次《使徒行者3》反應一般,不過唔少網民及粉絲都期待林峯可以得獎。另外,唔少網民都「黑人問號」馬國明竟然憑《使徒行者3》入圍,而唔係《降魔的2.0》。

《使徒行者3》林峯、《踩過界II》王浩信 & 《使徒行者3》馬國明
《使徒行者3》林峯、《踩過界II》王浩信 & 《使徒行者3》馬國明

最佳女主角:
今屆「視后」真係勢均力敵,好似冇一個女藝員係特別標青。唔少網民就認為龔嘉欣今年表現不俗,喺三套主演劇集(《大醬園》、《殺手》及《香港愛情故事》)都發揮到水準,演技備受認同,相信佢可以憑《殺手》癲喪女殺手易蘭一角奪獎。另外,網民亦認為《法證先鋒IV》飾演Dr. Man嘅李施嬅及《踩過界II》飾演「鐵三角」之一癲姐嘅蔡思貝都非常有機會登上視后寶座。

《法證先鋒IV》李施嬅、《殺手》龔嘉欣 & 《踩過界II》蔡思貝
《法證先鋒IV》李施嬅、《殺手》龔嘉欣 & 《踩過界II》蔡思貝

最佳男配角:
今年的確有唔少出色嘅男配角,不過呼聲高嘅都係老戲骨,佢哋分別係《香港愛情故事》飾演大男人陳漢聲嘅白彪、《反黑路人甲》飾演社團大佬喪鐘嘅徐榮及《香港愛情故事》飾演地產經紀Henry嘅林景程,網民都認為佢哋嘅演技非常到位,成功為劇集加咗唔少分。

《香港愛情故事》林景程、《香港愛情故事》白彪 & 《反黑路人甲》徐榮
《香港愛情故事》林景程、《香港愛情故事》白彪 & 《反黑路人甲》徐榮

最佳女配角:
《最佳女配角》嘅競爭同樣相當激烈,而大熱人選分別係《香港愛情故事》飾演莫少霞嘅龔慈恩、《反黑路人甲》飾演社團大家姐水姐嘅蔣家旻及《反黑路人甲》飾演大小姐蔣千霞嘅賴慰玲。想知最後邊個拎?大家就要拭目以待喇!

《反黑路人甲》蔣家旻、《反黑路人甲》賴慰玲 & 《香港愛情故事》龔慈恩
《反黑路人甲》蔣家旻、《反黑路人甲》賴慰玲 & 《香港愛情故事》龔慈恩

按此下載全新應用程式Yahoo APP,並以Yahoo電郵免費登記成為會員,即時可完成簡單任務賺取Ypoints,憑分即可換領不同獎賞! 新人更可即時換領限量新人禮,立即下載!