葉麗儀靠《上海灘》收50年版稅袋幾百萬 曾座擁16層樓全球收租 過來人戥MIRROR辛苦

粵語流行金曲《上海灘 》膾灸人口紅遍華人社群，原唱者葉麗儀Frances今年已經77歲，但仍然活躍歌壇，下月將會再次舉行2場演唱會。Frances近期接受報章訪問時提到《上海灘 》令佢名成利就，單係版稅已經有7位數字，Frances更成為「國際包租婆」！

1969年參加TVB歌唱比賽入行嘅葉麗儀，同顧嘉煇、黃霑嘅「煇黃」組合合作無數，1980年劇集《上海灘 》同名主題曲正正係呢個鐵三角嘅得意之作。Frances透露劇集開拍前已經欽點由佢唱主題曲，顧嘉煇更以Frances嘅音域度身訂造旋律。

周潤發、呂良偉同趙雅芝合演嘅《上海灘 》劇集爆紅，主題曲連帶成為金曲，葉麗儀直言《上海灘 》為佢帶來好多桶金。先講版稅，Frances話收到歌曲推出後第一張支票，銀碼足以喺當年買一層樓！而當年Frances係跨國唱片公司EMI歌手，按傳統歌手係由歌曲推出後收足50年版稅，無論係精選唱片以至近年嘅聽歌app都會有版稅分俾Frances，佢話而家每年會收到2張版稅支票，估計直到而家《上海灘 》推出44年已經收咗幾百萬！

《上海灘 》一曲走紅仲為葉麗儀帶來大量演出機會，Frances表示《上》推出後為咗把握機會有5年不停工作，做到𤷪𤺧又胃痛。不過當時收入好豐厚，葉麗儀話當時去新加坡登台，一晚唱兩場就有20萬坡紙，夠喺當地買個單位。密密做亦密密買磚頭，葉麗儀全盛時期喺香港、星馬、英美澳加等地擁有16項物業，部份仲要係獨立屋，連羅文都曾經稱佢做「國際包租婆」。進入「收成期」，葉麗儀現時保留6項物業，包括一間香港半山千呎單位，淨收租都幾萬蚊。

進入財務自由，葉麗儀話而家生活都係湊吓孫同打吓高爾夫球，最大使費係機票錢，因為去旅行唔係坐頭等就商務。身為樂壇前輩，Frances都有留意新一代，佢喺訪問提到MIRROR，而且以曾經同鏡仔一樣日做夜做嘅過來人身份戥佢地辛苦。葉麗儀希望MIRROR背後話事人愛錫佢地就應該好好考量，以免耗盡佢地。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！