蔡俊彥評述劍擊戲言願張家朗對手受傷 事後發文道歉 與呂爵安Edan曾是大學室友 ｜巴黎奧運

港隊男子花劍代表張家朗出戰巴黎奧運再次奪金。張家朗喺16強賽事以15比10擊敗國家隊莫梓維晉級。比賽期間莫梓維一個跨步後疑似拉傷，而喺香港ViuTV直播負責評述嘅港隊運動員蔡俊彥Ryan，喺莫梓維接受治療期間，居然講咗句「據我所知佢（莫梓維）足部有傷，唔知有冇觸發到舊患……希望觸發到啦」。

雖然蔡俊彥係張家朗隊友，但呢項言論頗欠體育精神，事後Ryan知衰，喺個人社交平台發文致歉，並喺直播節目中再次向莫梓維道歉。翻查資料，原來蔡俊彥2022年喺亞洲鈍劍錦標賽四強賽事，一劍之差不敵莫梓維……難怪Ryan咁了解對方啦。

26歲嘅蔡俊彥係港隊花劍隊成員，世界排名曾最高位列第8，並曾於2022年亞運會奪得2面銅牌，並於去年世錦賽鈍劍團體賽奪得銅牌。蔡俊彥入讀港大時，與現時男團MIRROR成員Edan呂爵安係室友。

上屆東京奧運，Edan做直播節目時曾經提到俊彥。「平時嗌佢蔡仔，佢都幾cute嘅個人，同埋不嬲都知佢打劍好叻嘅，佢全世界排名第八名，希望佢可以變到第一名啦！加油！」，而蔡俊彥亦隔空感謝老友打氣「我之前有個大學好好嘅朋友，喺鏡頭前面同我講加油，我頭先成個腦都係佢嘅歌，咁我祝返佢嚟緊嘅票房大賣啦！」。早前江旻憓奪金，Edan都有留言話睇到Ryan評述感覺好有趣。

蔡俊彥今屆奧運卻失個人和男花團體賽資格，但就獲ViuTV邀請為劍擊賽事擔任評述，不過首次擔任評述嘅佢表現毀譽參半。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！