蔡少芬陀第三胎狂喜億半樓后Ada再入市

東方新地 - 娛聞

2019年7月26日上午2:44

蔡少芬（Ada）08年嫁張晉，連生兩個寶貝女楚兒與信兒，計劃追仔多年，Ada邊北上搵人仔邊努力，今年終於意外再懷孕，45歲已屬高齡產婦的她如願以償。Ada無懼當年曾經歷小產，陀第三胎狂喜，繼續湊女周圍飛的忙媽生活，早前更一家返鄉探親，在重慶玩水又周街食雪糕，大肚Ada百無禁忌愉快陀B。近年Ada在國內發展豬籠入水，老公張晉亦人氣急升，夫婦二人吸金力強，出名慳家的Ada持家與投資同樣有道，現時在中、港兩地手持市值1億半物業，被封圈中樓后，為賀第三胎，Ada有意於新界區再入市，為了下一代有優厚生活條件，未雨綢繆，張家小B未出世已是人生勝利B，有個富媽媽真幸福。

撰文：東方新地圖片：新傳媒圖片、IG、微博

蔡少芬陀第三胎狂喜再入市

蔡少芬（Ada）與張晉結婚11年，育有兩名女兒，分別是8歲的楚兒及6歲的信兒，雖然曾公開自爆10年拍《後宮甄嬛傳》時曾小產，但45歲的Ada為生B非常努力，連生兩個女後亦曾計劃再追仔，不過一直未能成功。月前兩夫婦突然在網上拍片報喜，宣布Ada陀第三胎，獲全城祝福。早前張晉完成新戲《九龍不敗》的宣傳工作後，一家四口就返回重慶老家探親兼充電，更與親友到市郊的古鎮遊玩，被網友野生捕獲。

奶奶有望抱男孫

已是高齡產婦的Ada本來對追B一事已放下，這次意外懷孕令全家都非常興奮，知情者透露：「大家都知Ada同老公努力咗幾年都冇聲氣，Ada都放低咗諗住唔再追，有兩個女都好開心好滿足，點知一放鬆就有咗，真係上天畀佢哋嘅一份大禮，楚兒同信兒知道有多個細佬或者妹妹都好開心，佢哋都可以幫手照顧BB，不過最開心都係奶奶，佢一直恨抱男孫，今次Ada叫胡成數都好高，呢半年Ada同奶奶一齊拍國內真人騷《我最愛的女人們》，婆媳關係真係好到不得了，睇嚟奶奶真係好滿意呢個新抱，張晉娶咗佢，大旺事業，Ada自己又本事，近年喺國內大受歡迎，最難得係肯生仔，生三個真係唔易，佢仲要係親力親為去照顧同湊，真係好勁。」

雖然陀B6個月，Ada個肚唔覺累贅，手腳仍纖幼，身手仲相當敏捷，不過拎粗重嘢最後都係交畀老公張晉啦！

知道Ada陀第三胎，張晉即變緊張老公，雖然阻不了老婆周圍飛，但他亦停工傍實，早前一家四口趁囡囡放暑假，飛返張晉家鄉重慶探親兼遊玩，更被拍到去到市郊偏岩古鎮遊覽，同行還有張晉父母。為免引起哄動，Ada跟張晉都戴上口罩，而張晉亦對大肚的老婆照顧有加，不時為太太影靚相留念，而Ada更一試古鎮有名的河上打牌，跟親友聯誼感情。

去年結婚十周年，Ada與張晉穿上當年結婚的禮服，與楚兒及信兒一齊再到影樓影全家福。

大肚任性犯禁

其實早於4月未公開三度有喜時，Ada與張晉及奶奶已遠赴西班牙為國內真人騷《我最愛的女人們》拍外景，當時已知懷孕的Ada非常勞碌，幸好有老公及奶奶同行照顧，之後她又返國內繼續為真人騷拍攝，上山下海落田插秧又劈柴，被指大肚婆不錫身，而且懷孕至今亦不戒口，多次被目擊食生冷嘢，如軟雪糕及凍飲，此外仲周圍飛，早前又被捕獲與老公去了台北玩，做盡所有大肚禁忌。

兩公婆撇下兩個女撐枱腳，現場所見， Ada 不時向老公撒嬌，又把自己的手機短訊遞給張晉睇，似有冤枉氣要吐。當日 Ada 未有戒口繼續飲凍飲。

Ada現時陀B約6個月，預產期約在10月，身材向來高䠷的她，今次陀B非常瀟灑，雖然已停工安胎，但買樓成癮的Ada仍不忘投資，知情者說：「Ada依家手持嘅物業全部都有價有市，有啲已經賺成倍，佢睇嘅係長線，所以好多都唔會放，只會收租，嚟緊佢都想再買多層，買嚟都係留畀三個仔女，確保佢哋第時生活無憂。Ada都係主攻新界嗰邊嘅豪宅，兩個囡囡依家喺沙田石門讀國際學校，佢都會睇吓附近嘅盤。」喜歡買磚頭保值的Ada11年為迎接大女楚兒出世，由沙田搬去元朗錦綉花園獨立屋，13年細女信兒出世後，為兩女將來讀書著想又連環掃樓，分別在柯士甸凱旋門及灣仔囍匯各買單位，目的是包抄九龍港島區名校校網，隨住兩女日漸長大，活動空間需求大，15年底以二千六百萬買入元朗爾巒獨立屋，而她在內地亦有投資買樓，現今已手揸億半港元物業。

夫婦元朗出巡

最近Ada與老公張晉樂得清閒，7月3日踢拖外出歎早餐，之後再駕車送外傭去街市買餸及接囡囡同學返屋企玩。7月4日二人到元朗買電腦，連見兩日Ada都穿同一條連身褲，可見張太絕對樸實無華，走平民風格不好名牌，難怪可以慳出億半物業成為樓后。大肚Ada坐唔定冇時停，陀B6個月四肢依然纖幼全無半點水腫，不過素顏卻清楚見到爆晒瘡，有說陀仔會令媽咪荷爾蒙有變，皮膚會變差，若然為張家成功添個金叵羅，Ada揀定層豪宅由張晉畀錢都好應該吖。