蘇施黃開收費頻道教煮食 80蚊月費乜都冇 800蚊先有得任睇

向來搶口嘅蘇施黃無做電台之後，轉做youtuber分享飲食生活見聞，開台2年已經有超過16萬用戶訂閱。雖然有廣告費同贊助商，但係錢梗係入自己袋最實際，近日阿蘇就宣布設立收費會員制，原因係剪片開支太大！

阿蘇仲按照「課金」數目訂立會員3級制，最平嘅「合桃蘇」月費80蚊，竟然係冇片睇，只會得到阿蘇嘅emoji，連續12個月就有禮品一份。中價嘅「鳳梨蘇」有上述待遇之外，仲可以睇英文冇字幕教煮餸片2條，盛惠400蚊一個月。最高級嘅「蝴蝶蘇」8百蚊一個月有得任睇煮食片，有得同阿蘇開zoom傾偈1個鐘，可以購買佢推介嘅有機菜，連續課金6個月仲可以參加阿蘇搞嘅活動，可能係行山或者大食會，不過要自費。

消息一出，唔少網民都認為開價太進取，因為而家網上煮食頻道多的是，仲免費添。另外有網民舉例有網台年費都係1000蚊，但係有唔同節目選擇。

67歲嘅蘇施黃多次進出電台，十幾年前因為開咪講煮餸而被有線邀請拍煮食節目，見反應好立即自行製作節目賣俾TVB，收視好之餘仲吸到唔少贊助商同代言廣告。後來阿蘇自言年紀大要搵錢傍身，於是搞talk show《我要賺兩億》吸金之餘亦教觀眾搵銀，但係反應麻麻。2014年阿蘇去酒店飲茶，要求侍應俾多個茶包，但酒店堅持要收2杯茶錢。阿蘇因此嬲咗，開post鬧酒店又批評侍應蠢，點知網民一面倒唔撐。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！