袁澧林加入港甲女足簽約公民 澄清唔關周星馳新片《少林女足》 事

被稱為「文青女神」嘅袁澧林Angela其實有運動根底，本身熱愛打排球之餘，原來都對足球有興趣。本地女子甲組球會民和公民女子足球隊，尋日喺官方社交平台上宣布已簽約成為旗下球員，並貼上袁澧林身穿球隊波衫揮灑汗水嘅相。有報導指Angela會先隨隊跟操，暫時未成為正式註冊球員。

由於近期有消息指，周星馳即將開拍新片《少林女足》，令外界聯想到袁澧林係咪會參演該片。加入公民嘅消息公布後，袁澧林發文回應，強調唔會放棄演戲，佢係因為工作而接觸足球，但澄清同《少林女足》無關。「非常感謝民和公民畀我一齊跟隊練波，本來好怕會打擾大家嘅操練，但得到隊員既熱烈歡迎，我都感到有點措手不及。放心我不是放棄演員的本業，甚至是因為工作才開始準備的！未能告知是跟什麼有關，但就絕對跟少林女足無關。聰教練話『技術不錯』就真是太厚道，我知自己暫時都未上到台面住！但就絕對會心存感恩的心努力練習！」

民和公民喺上球季聯賽排名第3，球隊教練梁冠聰表示，球隊有球員同Angela相識，並知道袁想學踢波，雙方於是一拍即合。梁冠聰透露表示袁澧林現正參與季前練習，認為Angela有天分，唔排除會註冊佢成為正式球員，但要時間訓練到有競技水平。

至於同袁澧林嘅「前緋聞男友」Edan呂爵安都表示知道Angela加入甲組球會嘅消息，亦知道對方一直鍾意做運動，但就話雙方好少聯絡。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！