《身邊總有個拍緊拖一直扮單身嘅人》

每個人身邊都會有一兩個明明拍緊拖，但一直喺人面前扮單身嘅男女。佢哋呢啲扮單身嘅行為十居其九都係同低調無關，亦未必代表段關係唔穩定或者唔見得光，說到底都只係想留一線收兵嘅空間。

雖知天下娘娘這麼多，你要叫人入伍，你都要畀啲幻想空間佢，佢先會主動乖乖填表服兵役。情況就好似八九十年代嘅藝人，最怕戀情暴光，原因都只係想留一線幻想空間畀粉絲。

呢啲人嘅社交網站係搵唔到任何拍拖嘅痕跡。去旅行張張都獨照，去高級餐廳食飯都係獨照，聖誕節嗰張同聖誕樹嘅合照都係獨照，咁邊個幫佢揸機？重要咩？總之佢一日無宣佈被佔有，就代表未有被官方認證嘅勝利者，所以各位同志都仲有機會插旗。

我以前公司有對男女拍拖，全公司都知道佢哋係一對，但係個男仔每次都會堅決否認。甚至兩個人明明一齊放大假，又一齊post咗韓國相，但個男仔都仲會話自己同朋友去。成日覺得男人老狗做咩咁啫，既然大家都知道啦咪大方啲認咗佢囉，見到你咁無膊頭閃閃縮縮，我都戥個女仔唔抵。我一直唔明佢扮咩偶像派，拍拖啫，其實公司無人會在乎㗎！我一直以為佢只係一個廢柴男人唔敢承認，但世事原來無咁簡單⋯⋯直到有日我唔小心見到佢FB inbox有個女仔send咗堆曖昧嘅示愛訊息，我就明白，原來唔係龜縮，係幕後玩家。