《逆緣》黎諾懿向夏文汐表白 重溫無綫經典姐弟戀
噚晚播放嗰集《逆緣》夏文汐同黎諾懿嘴嘴,搞到大批觀眾叫救命。其實無綫劇集玩姐弟戀都唔係第一次,等我地同大家重溫一下有邊幾套劇中出現過姐弟戀,而你又頂得順幾對呢?
《逆緣》夏文汐&黎諾懿
52歲嘅夏文汐喺《逆緣》中同37歲嘅黎諾㦤發展忘年戀,佢地參加完船上派對後情投意合,之後黎諾懿車咗夏文汐到沙灘向佢表白,仲咀足20秒。
《刀下留人》康華&張景淳
張景淳演皇帝明憲宗同康華飾演嘅萬貞兒(萬答應)發生忘年戀。歷史上明憲宗和萬答應確確實實年齡相差十九歲。
《有營煮婦》伍詠薇&麥長青
失婚婦人魯小美(伍詠薇飾)覺得自己條件仲係好好,有機會揾到個好男人。點知同咗租客游佳(麥長青飾)一齊,不過魯小美嫌棄呢段姊弟戀,唔敢光明正大拍拖。
《女人唔易做》吳美珩&林峯
高Ling(吳美珩飾)經歷過失敗婚姻,對愛情失去信心,點知比佢細7歲嘅小齊(林峯飾)對佢窮追不捨,最終打動高Ling芳心。
《妙手仁心》陳芷菁&馬浚偉
年輕醫生Joe(馬浚偉飾)愛上護士長Helen(陳芷菁飾),可惜Helen忘記唔到已經過身嘅丈夫,未能接受新戀情。馬浚偉用真情感動Helen,最終二人結婚,婚後更去外地做無國界醫生。
《妙手仁心II》邵美琪&曹永廉
急症室醫生Chris(曹永廉飾)苦苦追求婦產科主任Anson(邵美琪飾),可惜Anson心裡一直有條刺,無辦法接受Chris。最終Anson同Chris為咗愛情而互相改變,有情人終成眷屬。
《天梯》張可頤&陳豪
苗天(陳豪飾)唔理大家反對都要娶比自己年長7年、兼已為人母嘅寡婦顧新月(張可頤飾),仲用咗50年為修鑿出一條六千級的石梯。呢個故事係真人真事改編,係生死相隨的愛情。
《衝上雲霄II》江美儀&馬國明
機師Roy(馬國明飾)與艙務長Head姐(江美儀飾)嘅姊弟戀真係好浪漫,劇中除咗有佢地嘅激情戲外,最後阿Roy仲刻意化成滿鬢斑白,攞着玫瑰花向Head姐求婚一幕,感動唔少觀眾。
《男親女愛》鄭裕玲&黃子華
思想保守、好勝心強嘅Miss Mo(鄭裕玲飾)同好食懶飛又鍾意賭馬嘅阿Lok(黃子華飾)兩人由日日頂嘴,由歡喜冤家到日久生情發展地下情,劇中30秒嘅接吻鏡頭更被觀眾喻為世紀之吻。
《名媛望族》江美儀&吳卓羲
劇中除咗江美儀黑絲情挑劉松仁個幕最令人印象深刻外,江美儀偷食吳卓羲亦都引起熱話。江美儀飾演鍾卓萬(劉松仁飾)的三太太,遇上年輕後生仔木水(吳卓羲飾),二人互相慰藉。