鄭中基復出拍片交代將來發展 網民感覺強顏歡笑：好好照顧自己

鄭中基（Ronald）於上月初社交平台宣布，發現經理人何慶湘（湘姐）工作及道德操守有問題而終止合作，及後又發聲明指何慶湘已正式離職，自己則自爆有抑鬱和酗酒問題，因個人情緒健康問題將於完成演唱會後暫時休息至另行通知，並由太太陪同到美國參加戒酒中心嘅療程。YouTube頻道「機動電視台RTV」官方Instagram早前於限時動態收集「一人一個醫院之匪夷所思」投稿，以準備製作醫院趣事嘅影片，不過因鄭中基早前嘅聲明令網民紛紛猜測係咪都係由鄭中基繼續主持。而鄭中基前日（11日）又再出PO，表示YouTube頻道「機動電視台RTV」將於周四（12日）陸續出返片，並會由「匪夷所思」作為第一條片，唔少網民留言表示期待，但就有網民希望佢哋可以認真講一次事件既原由：「唔知點解好似唔關睇片既觀眾事，但又好想機動認真講一次事件既原由，就算鄭中基係公司食女又好酒精出事都好，湘姐手腳唔乾淨或同鄭中基有一手又好，鄭太問題又好，唔好一句話職業操守有事就完左，如果成件事唔關湘姐事，就真係一句說話完左1個人既職業生涯。」

「機動電視台RTV」於昨日（12日）晚上9時準時發布新一條影片，主持人繼續係鄭中基，鄭中基於節目上分享網民嘅趣事投稿，全程輕鬆，更不時爆笑。只係去到尾聲時，鄭中基突收起笑容宣布之後YouTube頻道發展：「最後我都好想多謝大家一路嘅支持，嚟緊9月高雄演唱會之後，我就會暫時休息一段時間。喺我聲明度，大家都知道，我就會去美國，去一個戒酒嘅療程，跟住我會休息，個Channel暫時會由其他同事營運住先，咁大家放心，我之後會再返嚟嘅！除咗匪夷所思之外，仲有其他創作節目畀大家睇㖭。希望大家喺呢段時間可以繼續支持Channel，同埋我哋咁多位同事同埋我哋嘅成員，我哋嚟緊再見，拜拜。」唔少網民留言指終於等到鄭中基拍片，但就覺得佢係強顏歡笑，希望佢可以加油，又表示會等佢回來：「我哋會一齊支持你。好好照顧自己身體，期待你盡快回來。在節目中帶給我們歡樂及正能量」、「我以正面態度去支持大佬回歸，希望大佬休息多d（啲），之後諗更多好節目比我地睇」、「見到大佬憔悴左好多，心痛，大佬加油！！！！共勉」、「永遠支持Ronald」、「強顏歡•笑，加油大佬」、「支持中基，謝謝你陪伴我地一齊捱過最難捱嘅日子，繼續努力，加油」等等，但都有網民提到湘姐，指無交代事件：「本身湘姐單嘢就匪夷所思可以拎出嚟講啦」、「湘姐失蹤之匪夷所思」、「無交代事件就咁繼續開始感覺怪怪的難投入」等等，不過都有網民表示，私人嘅事唔交代又真係無佢乎，指點解要交代咁多嘢。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！