60歲呂方跳唱演出新歌盡顯發福身型 網友: 圓方

實力派歌手呂方1983年參加第二屆新秀歌唱大賽奪冠後入行，去年舉行入行40周年演唱會，擁有無數經典歌曲，其中《彎彎的月亮》、《朋友別哭》等喺兩岸三地廣受歡迎，可以話係香港樂壇其中一位低調高手。早前有網民喺小紅書分享今年「登六」嘅呂方喺內地登台片段，片中所見呂方身型比以前膨漲唔少，更有網民覺得呂方發福到「唔見咗條頸」，甚至戲稱呂方已經變成「呂圓」、「圓方」。

早前呂方推出跳舞曲風嘅單曲《跳舞吧》，近排有現場演出當然會唱新歌，仲會跳唱一番。而家一副Daddy身型嘅呂方都好落力演出，即使貼身衫之下腩肉盡現，都仲係跟住節奏un住un住。網民當然繼續討論呂方身型，有口痕網友就話「以為走咗個王天林出嚟」，啋！天林叔走咗好多年啦，而且呂方同天林叔嘅霸氣身型仲爭一大截。

睇返網民分享呂方2007年紅館演唱會嘅演出片段，當時呂方都仲keep得唔錯。

呂方2020年同年輕過佢16年嘅企業家伍惠寶(Rainbow)結婚，同年誕下女兒。升呢做老豆之後呂方盡現「幸福肥」，近年每次現身都被指身型日益橫練，但呂方不時喺微博分享跑步相，相信佢都有為健康努力。曾經係煙民多年嘅呂方，喺囡囡出世後戒煙成功，佢話個女幾個月大時，聞到爸爸身上有煙味之後擰歪面，令呂方決心戒煙。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！