黎諾懿分享與《四葉草》演員21年後聚會照 戴夢夢直言眨眨眼睛變中年

TVB青春偶像劇《當四葉草碰上劍尖時》以劍擊項目為主題，由黎諾懿、李日朗、黃婉佩、唐詩詠、姚子羚等人演出，亦有眾星雲集嘅客串卡士陣容，包括陳奕迅、容祖兒、謝霆鋒及Cookies等等，於2003年播出時深受觀眾歡迎。今年8月份，因張家朗和江旻憓於巴黎奧運雙雙奪金，TVB亦安排劇集《當四葉草碰上劍尖時》於星期六日深夜時份重播，掀起回憶殺。21年過去，當年一班青澀演員已各有發展，甚至已婚及有小朋友；日前，定居新加坡嘅黃婉佩（Race）返港，一眾演員趁機舉行聚會。

黎諾懿於社交平台大曬合照；從照片中睇到，有份出席聚會嘅包括高皓正、戴夢夢、黃婉佩、黃婉君、姚瑩瑩及李日朗，黎諾懿表示懷念從前，寫道：「有冇勾起大家嘅回憶？大家有冇睇過《當四葉草碰上劍尖時》，對我來說，四葉草係其中一部拍得最開心嘅電視劇，很懷念，當時跟大家一齊冒險，一齊為夢想衝刺，今日大家各自發展，希望有日，我們會以某一個組合同時出現」，黃婉佩和姚瑩瑩分別留言表示好開心，黃婉佩回應：「老朋友聚一聚真係開心」；姚瑩瑩則表示：「好開心，見到大家一定要聚多啲」；至於無出席嘅姚子羚亦留言指，希望黎諾懿快啲想想重組。

另外，戴夢夢亦有PO出聚會照，表示眨吓眼就變中年，但與以往一樣雞啄唔斷：「難得Race回港，四葉草21週年聚會，真是非常之開心，眨眨眼睛我們都變中年了，但是我們還是和以往一樣雞啄唔斷，好像還有很多很多事要同彼此分享，我們要好好珍惜這段友誼，多見面，永存在心中」，又指今次無出席嘅演員下次要再重聚：「兩小時的聚會真的不夠，今次我們尚欠Natalie、Elaine、Kelly、Sam、雨陽、嘉樂、Edmond，下次我們真的要好好聚一晚」；佢又於Hashtag感謝黎諾懿請食Lunch。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！