《中年好聲音2》女團MISSY出道兼宣布開騷 網民反應大不同：C團成員長大後

近年香港樂壇有不少女團出道，最新嘅由TVB《中年好聲音2》有35歲陳俞霏、39歲陳芊芸（陳蒨葶）、36歲王玥、36歲林思彤（林若盈）、35歲陳譽文（陳燕娜）組成嘅MISSY，佢哋噚日（3日）喺尖沙咀舉行記者會宣布出道，並透露下月10日喺麥花臣場館開騷《MISSY Raise Your Voice Concert》 。

作為首隊由《中年好聲音》比賽誕生嘅女團，五位成員噚日以型格造型亮相，成功吸引逾百粉絲到場支持。MISSY除咗推出新歌《Flow With Us》，下月10日仲喺麥花臣場館開騷《MISSY Raise Your Voice Concert》 ，票價分別為$980、$780及$680，認真犀利！被問到演唱會準備情况時，王玥就笑話見隊友多過見家人同朋友，同時佢哋亦好珍惜今次踏上舞台嘅機會，最近好努力排舞練歌，希望將最好嘅一面呈現俾大家睇。而陳芊芸就話無論係演唱會主題、歌單編排、舞台設計、造型、化妝，佢哋都費盡心思。

MISSY一出道，隨即引起網民瘋狂討論，甚至以COLLAR作比較，例如「咁女團又真係無界定最高幾多歲嘅」、「咁collar 年紀又真係差好遠既」、「C團成員長大後… (唔包餃芯) 」、「婦女時代」、「阿嬸時代」、「一定係中年 但唔一定係好聲音」、「芯駖靚十倍」、「呢個價錢似乎會滯銷」、「真係笑死人，好心啦，唔係以為自己係韓女團呀嘛」、「人哋女團青春期，佢哋女團更年期」及「成班中女扮後生，想嘔」等等，不過亦有網民應該佢哋有實力值得支持，留言「期待新歌 撐爆女團」、「好想快啲聽到新歌」、「希望工程成功」及「Missy Missy 我哋支持你」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！