容祖兒江門演出失聲 冇唱歌照上台道歉 觀眾喪嗌回水

近年主力內地發展嘅容祖兒，周六（2日）晚喺家鄉江門出席名為《星耀灣區演唱會江門站》嘅演出，同楊宗緯等歌手一齊演出，不過近期身體抱恙嘅祖兒終於頂唔住，即使上台現身但就未能演唱，仲要同觀眾道歉。

根據內地網民發文及現場片段，聲沙沙嘅容祖兒喺台上表示自己因病失聲，感激主辦單位嘅體諒，同埋觀眾對佢嘅支持。祖兒話希望下次有機會可以「雙倍奉還」為大家送上靚歌，並且歡迎佢再次返家鄉。隨後舞台上播出祖兒嘅《我的驕傲》國語版《揮著翅膀的女孩》，並且向台下觀眾揮手，之後就返後台，全程大約十幾分鐘。

雖然見到容祖兒真人，不過唔少內地歌迷話係為祖兒慕名而來，先至會買飛睇呢個由幾位歌手合演嘅「拼盤show」，甚至認為祖兒先係最大賣點，因此不滿主辦單位安排。而現場更有唔少觀眾高呼「退票」。有網民認為祖兒唔係突然失聲，點解唔事先宣布，等歌迷同祖兒都唔使白行一趟。

的確容祖兒唔係喺江門上台前先病，上周五佢演出《聲生不息港樂季2》，有觀眾爆料指祖兒已經失聲，但仍然唱出《心淡》一曲。第二日佢錄完節目由湖南長沙趕往懷化參加另一個演出，同樣因為失聲而未能獻唱，只能夠上台向觀眾道歉及揮手。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！