鄭中基自爆不滿《無賴》被無綫要求改歌詞:由嗰時開始我就唔妥TVB到依家
鄭中基(Ronald)較早前開設YouTube頻道「機動電視台RTV」,其「匪夷所思」系列一直大受歡迎,日前Ronald喺頻道上載一條關於佢自己廿多年前拍過最匪夷所思嘅MV,講到代表作《無賴》時佢更自爆喺嗰時開始就唔妥無綫。
鄭中基喺片中大數多首匪夷所思嘅MV,例如《人若然窮到當嘢》、《美女與野獸》及《人若然忘記了愛》等等,而片段中Ronald就認為最匪夷所思就係自己完全冇印象拍過《美女與野獸》,佢話:「因為多數我唔記得嗰啲,應該係以前《勁歌》拍㗎,因為當時TVB要自己嘅Version MV,咁所以好多時我哋通常統一咗佢,拍一次無謂拍三四次﹗」。
之後,Ronald更爆出由《無賴》開始就唔妥無綫,原因係TVB曾要求佢更改其中一句歌詞中「兩個字」先俾佢參加節目《勁歌金曲》,而令佢一直對TVB怒氣未消,覺得一直不被尊重而多年拒絕亮相。佢話:「『曾話過要戒煙』 但講了就算』,佢唔知點解唔俾我講「戒煙」,我就特登要入錄音室錄過另外一句歌詞,就係『曾話過要儲錢,但講了就算』。」當Ronald講完呢句,身旁兩位主持馬上記得《無賴》的確有兩個版本嘅歌詞!
Ronald繼續講:「總之呢個係我嗰陣時開始嬲TVB,而我嬲TVB之餘,我嬲返自己公司!我話點樣可以一個artist嘅歌,為咗一個電視台就去改兩隻歌詞,淨係For佢?但嗰刻就算啦,錄咗佢係因為公司問題啦,咁就要做咗件事佢﹗但就由嗰時開始我就唔妥TVB到依家。到而家咁多年嚟,你哋都未見過我喺TVB出現﹗即係等如你話Michael Jackson,我唔鍾意你隻歌叫《Billie jean》,你淨係可以叫《攞嚟賤》,你讀呀!咁人哋會唔會睬你先?係唔係先?」
唔少網民睇完影片後,紛紛留言支持佢,例如「十分欣賞你最後那段說話, 有種!!! 好想知道如果到今天要重拍一首歌, Ronald會揀邊首和想點樣拍呢?」、「講戒煙都唔得 真心唔明 又唔係講食煙 支持大佬 你搞到我勁好奇要挖番你d MV笑一次」、「暴龍哥好嘢有骨氣,抵我咁多年都支持」、「嬲得有道理, 做得好,支持。上多啲ViuTV 。」及「大佬堅實係個有骨氣既真男人,無得傾」等等。
按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!