金城安Bonnie分手群情洶湧 網民哭崩嗌「棄劇」 周嘉洛：可能復合呢！

劇迷追得非常上心的《愛．回家》，前晚講到Bonnie要跟金城安分手，搞到網民嬲豬嗌「棄劇」！飾演金城安的周嘉洛急急「出口術」挽留觀眾：「千祈唔好棄劇，仲有好多嘢好好睇，之後可能會復合㗎嘛！」

無綫處境劇《愛．回家之開心速遞》是長年收視之冠，前晚播映的第1,500集，周嘉洛飾演的「金城安」與林凱恩飾演的「Bonnie」鬧分手，Bonnie突如其來的提出令金城安崩潰，更攬住「媽咪」滕麗名痛哭，不少網民表示邊睇邊喊，亦有鐵粉揚言因2人「閃分」而「棄劇」罷睇。

周嘉洛憑「金城安」一角成功入屋，勇奪「最佳男配角」之餘更受無綫重用，於劇集《痞子殿下》擔正「男一」，又入《四十二章經》劇組與視帝陳豪合作，最近開拍新劇《回歸》與兄弟吳偉豪拍住上，由於「外闖」後一帆風順，他有排都未能重返《愛》劇，才引發這場分手戲，據知林凱恩亦被迫減戲份，有網民看完前晚一集後說：「如果冇咗安仔，Bonnie仲需要留喺《愛．回家》嗎？」

林凱恩晒合照：好好珍惜

眼見網民群情洶湧，林凱恩急急上載與周嘉洛的合照，留言：「好好珍惜那個總能在你身邊陪着你的人，那都不是必然的。」又感慨「不是每場相遇都有結局」，怎料再次觸動網民神經，紛紛洗版：「不會再看了，真的接受不到！」、「睇完啦！我正式棄劇。」、「刻意寫死金城安，等佢專心拍劇，走吓一個走吓又一個，仲愛乜鬼回家呀！叫愛離家啦！」

嘉洛昨日受訪時「出口術」氹番網民：「我都有睇，係好傷心，不過又唔好棄劇，每個結束都係新嘅開始，或者Bonnie同安仔現階段唔啱啫！佢哋成長過後又有另一個新景象㗎喇！呢個都係我自己幻想，所以大家唔好傷心，千祈唔好棄劇，仲有好多嘢好好睇，可能之後會復合㗎嘛！大家要繼續睇落去先知㗎嘛！」

至於昨晚一集，「大小姐」林淑敏神還原網紅雪姨的「名牌福袋開箱事件」，之前雪姨邊爆粗邊以浮誇表情彈福袋冇料到，林淑敏的版本亦浮誇到極，更「腿張開」擺對腳上梳化，大出洋相，觀眾看完預告大讚編劇貼地，又讚林淑敏演繹夠晒放！