city’super開餐廳 落戶銅鑼灣 必試蒸氣Shabu Shabu+山形縣A5和牛

而家一講city’super,唔再淨係講有咩食材或新貨買返屋企喇~事關最近佢踩過界,喺銅鑼灣新商廈,開設首間正宗日式料理餐廳,以4大獨家日本食材,製作招牌健康料理、鍋物等菜式,加埋逾70款來自日本嘅地酒,啱晒三五知己嚟飲飽食醉。

呢度嘅菜式種類繁多,有沙律、刺身、燒物、湯烏冬、Shabu Shabu等款式,而且融入city’super 4大獨家日本食材,包括:

- 博多屋豆乳製品:city’super自家日式豆腐品牌,由日本職人以褔岡傳統方法,每日新鮮手製豆腐同豆乳製品。

- 山形縣產A5級和牛:選用嘅和牛名為乙女牛,來自山形縣最大嘅和牛牧場「山口畜產」,需飼養30個月以上,產量稀少,現時由city’super獨家原隻引入香港。

- 茅乃舍百年高湯:出產自福岡有過百年歷史嘅久原本家醬油廠,名為茅乃舍嘅湯包用日本各地食材熬製而成,味道鮮甜,而且冇人造香料同防腐劑,保留傳統日式湯底原有風味,而city’super時代廣場店係品牌首間海外分店。

- RF1沙律:糅合西方健康元素、日本料理精緻美學嘅創意沙律。

健康沙律 - 全日供應

博多屋絹豆腐牛油果沙律($138)配餐廳自家調製嘅薑味沙律汁
博多屋絹豆腐牛油果沙律($138)配餐廳自家調製嘅薑味沙律汁

近年大家都著重健康,呢道RF1招牌沙律——博多屋絹豆腐牛油果沙律,用上博多屋嘅新鮮絹豆腐,豆味香濃;配埋牛油果、生菜、紅蘿蔔同海帶,食落清新又口感豐富。

午市定食推介

色彩魚生飯&迷你烏冬定食($238)晚市提供單點選擇
色彩魚生飯&迷你烏冬定食($238)晚市提供單點選擇
中吞拿魚肥美嫩滑、海膽鮮甜甘香
中吞拿魚肥美嫩滑、海膽鮮甜甘香

鍾意食刺身兼打卡嘅朋友,不妨一試色彩魚生飯,6款時令刺身各自配飯分開一碗碗,再用通花木盤呈上,色彩豐富又優雅。時令刺身會隨機出現中吞拿魚、吞拿魚蓉、帶子、深海池魚、海膽等款式,並按季節定時更換食材。而米飯則用city’super位於日本新潟縣自家農場嘅出品,口感彈牙,師傅唔會加太多調味,盡量保留米飯嘅原味。午市定食會配埋迷你烏冬同沙律,而烏冬則用茅乃舍嘅高湯煮熱。

喜知次一夜干定食($198)晚市都可以單點
喜知次一夜干定食($198)晚市都可以單點
選用嘅喜知次偏大條厚身,上菜前用日本電爐高溫燒10-15分鐘
選用嘅喜知次偏大條厚身,上菜前用日本電爐高溫燒10-15分鐘

喜知次一夜干係每日限量供應菜式,因為喜知次喺日本來貨時已經吊乾,到港後需時用鹽水浸軟再起骨先可以燒製,每日備貨有限,所以午市點呢道菜,比晚市大機會食到。提提大家,午市定食配埋飯、湯品同前菜外,價錢平單點少少𠻹。

海鮮滑蛋湯烏冬($138)
海鮮滑蛋湯烏冬($138)

湯烏冬有幾款口味,全部湯底都用茅乃舍4款湯底調配,包括木魚湯、冬菇湯、雞湯同昆布湯,湯色清澈且鮮味濃郁。其中海鮮滑蛋湯烏冬嘅湯底會稠身啲,令烏冬易於掛湯,但鍾意淡口味嘅朋友,可能會覺得湯底略為鹹少少;而配搭來自日本嘅帶子、蜆同蝦都大隻爽口。

晚餐必試

味蔵特製蒸ShabuShabu鍋($488-$798/2人前)會由店員幫客人設定蒸煮時間
味蔵特製蒸ShabuShabu鍋($488-$798/2人前)會由店員幫客人設定蒸煮時間

晚市推介大家坊間少見嘅蒸ShabuShabu鍋,可以自選配山形縣產A5級和牛、美國安格斯肉眼或北海道產黑豚肉其中1款,每款肉有300g(追加分量除外),四方形木盤先鋪上由日本直送嘅蔬菜,包括旺菜、本菇、春菊、菠菜、舞茸、大蔥同豆腐,再鋪上肉片,蓋上木蓋後放喺蒸爐上加熱。

A5級和牛會不時轉換部位,現時為牛肩肉,蒸起後油香十足
A5級和牛會不時轉換部位,現時為牛肩肉,蒸起後油香十足
「肉包菜」愈多蔬菜愈解油膩感
「肉包菜」愈多蔬菜愈解油膩感

蒸好後可按喜好蘸傳統柑橘柚子酸汁,或配青蔥、柚子粉一齊食。另外店員推介「肉包菜」食法,用肉片包起多款蔬菜,口感豐富又清新啲。如果你揀配和牛,開飯仔建議大家將4大片肉開半,包多幾份肉包菜,感覺會更加滿足。

創作涮涮鍋($488-$798/2人前)
創作涮涮鍋($488-$798/2人前)
北海道產黑豚肉爽口唔油膩
北海道產黑豚肉爽口唔油膩

而湯鍋Shabu Shabu嘅肉類、蔬菜拼盤配搭,同蒸ShabuShabu一樣,而湯底有幾款口味。

博多屋豆乳鍋可以自製鮮腐皮,增加趣味
博多屋豆乳鍋可以自製鮮腐皮,增加趣味

5款湯底包括博多屋豆乳鍋、茅乃舍蔬菜湯、自家製番茄湯等。其中招牌豆乳鍋,係喺博多屋豆乳加入茅乃舍招牌高湯,集合兩家味道,甜中帶鹹;滾起後可以先飲啖湯,再落食材。

三陸名物蒸蠔($188/6隻)
三陸名物蒸蠔($188/6隻)

餐廳重有一系列按食材產地命名嘅日式料理或名物,好似三陸名物蒸蠔選用三陸海岸(世界三大漁場之一,橫跨青森縣、岩手縣同宮城縣沿岸)盛產嘅時令鮮蠔,並且按當地烹調方法,用鐵鍋原殼蒸蠔以保留原有海水味。蒸之前會先淋上茅乃舍木魚湯提味,蠔肉咬落juicy爽口。

特色地酒

其中4款具代表性嘅清酒
其中4款具代表性嘅清酒

地酒即係採用當地原料所釀造嘅清酒,而餐廳引入逾70款口味,可以由淡味到濃味分為4大類,而相中係較特別嘅款式(由左至右):

優雅香醇:刈穗 銀千樹 純米大吟釀

清爽薰香:鳥海山 純米大吟釀

濃醇旨口:七田 七割五分 純米

辛口淡麗:英勲 古都千年 純米

味蔵 by city’super

地址: 銅鑼灣糖街25-31號sugar+3樓

文:Cathy.C

相、片:Tom Li

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能