【阿嬌離婚】鍾欣潼與賴弘國不足2年就離婚 快結快離嘅仲有佢哋...

鍾欣潼（阿嬌）與台灣醫生賴弘國喺前年5月結婚，婚後二人不時喺社交網站放閃，不過今日就被爆出佢哋喺今年3月已經離婚，而佢哋亦分別承認離婚消息。其實除咗佢哋之外，都有唔少藝人快結快離，而家就同大家數一數啦！

蔡卓妍 & 鄭中基

蔡卓妍（阿SA）喺2004年與鄭中基（Ronald）拍電影《追撃八月十五》時撻着，當時二人一直否認戀情。直至2010年3月被爆出祕婚4年，阿SA同鄭中基就召開記者會，宣布曾結婚及已離婚嘅消息。佢哋2006年喺美國洛杉磯註冊結婚，不過因性格不合而分手，仲已經辦妥離婚手續幾個月。

黎明 & 樂基兒

天王黎明與樂基兒喺2005年開始傳出緋聞，仲喺2008年爆出喺馬爾代夫舉行婚禮，不過當時佢哋雙雙否認。去到2009年，佢哋再被爆出喺08年3月喺美國拉斯維加斯秘婚。佢哋呢段婚姻只係維持咗4年，喺2012年離婚收場。

裕美 & 林恩浩

裕美與圈外人林恩浩（Jason）喺2013年拍拖，並同年結婚。直至2016年裕美被爆出背老公暗交黃子恆，當時仲被拍到裕美喺男方寓所露台晒Bra，之後佢哋即時拍片道歉，仲話裕美因家暴已經同老公分居。最終裕美就話單方面搞緊離婚，亦與黃子恆已經分手。

何艷娟 & 吳志誠

2014年港姐季軍何艷娟喺2018年爆出「爺孫戀」，與年齡相差40歲嘅澳博營運總裁吳志誠入紙結婚，升呢做闊太，婚後仲不時被影到甜蜜出街拍拖。不過呢段婚姻只係維持咗8個月，何艷娟喺上年就喺社交網站宣佈離婚消息，仲話佢哋係和平友好嘅狀態下決定分開。

宋慧喬 & 宋仲基

「太陽CP」宋仲基及宋慧喬因拍攝韓劇《太陽的後裔》撻著，假戲真做嘅佢哋喺2017年10月舉行世紀婚禮，當時仲被譽為金童玉女，得到唔少粉絲嘅祝福。不過婚後就不斷傳出婚變嘅消息，直至上年6月佢哋突然宣布協議離婚，正式結束1年8個月嘅婚姻。

具惠善 & 安宰賢

具惠善與安宰賢喺2015年因拍攝韓劇《吸血鬼醫生》撻著，假戲情真嘅佢哋拍拖一年後結婚，婚後不時大晒恩愛放閃，仲被指係圈內嘅模範夫妻。不過可惜呢段甜蜜婚姻好短暫，佢哋喺上年8月宣告協商離婚。